ଗଞ୍ଜାମ, (ବାଘୁଆବାର୍ତ୍ତା): କୋଟିଏ ଟଙ୍କା ପାଇଁ ଅପହରଣ । ଯୁବକଙ୍କୁ ସାପ ଦେଖାଇ ଭୟଭୀତ କରୁଥିଲେ ଅପହର୍ତ୍ତା । ଏଭଳି ଅଭାବନୀୟ ଘଟଣା ଘଟିଛି କେ.ନୂଆଗାଁ ଥାନା ଅନ୍ତର୍ଗତ ଚିକିଟି ଗଡ଼ରେ । କେବଳ ଅପହରଣ ନୁହେଁ ନାଗ ସାପ ଦଂଶନର ଡର ଦେଖାଇ ରଖାଯାଇଥିଲା ଅଟକ । ଶେଷରେ ପଣ୍ଡ ହୋଇଛି ଯୋଜନା । ଉଦ୍ଧାର ହୋଇଛନ୍ତି ୪ ଯୁବକ । କୋଟିଏ ଟଙ୍କା ଦାବି କରି ଅପହରଣ କରାଯାଇଥିବା ୪ ଜଣ ଯୁବକଙ୍କୁ ସୁରକ୍ଷିତ ଉଦ୍ଧାର କଲା ପୋଲିସ । ଅପହୃତ ହୋଇଥିବା ଯୁବକଙ୍କ ମଧ୍ୟରେ ତିନି ଜଣ କଟକର ରହିଥିବା ବେଳେ ଜଣେ ଦିଲ୍ଲୀର । ଏହି ୪ ଜଣଙ୍କୁ ବ୍ରହ୍ମପୁରରୁ ଅପହରଣ କରିନେଇ ବ୍ରହ୍ମପୁରରେ ଗୋଟିଏ ଦିନ ରଖିଥିଲେ । ଏହାପରେ ଦୁବୃର୍ତ୍ତମାନେ ଚିକିଟି ଗଡ଼କୁ ନେଇଯାଇଥିଲେ । ଚିକିଟି ଗଡ଼ରେ ନୂତନ ପାତ୍ରଙ୍କ ଘର ପଛପଟେ ଥିବା କୁଡ଼ିଆରେ ଚାରି ଜଣଙ୍କୁ ବାନ୍ଧି ରଖିଥିଲେ ନୂତନ ଓ ତା’ର ସହଯୋଗୀ । କୁଡ଼ିଆରେ ବନ୍ଧକ ରଖି ନାଗ ସାପ ଦେଖାଇ କୋଟିଏ ଟଙ୍କା ଦାବି କରିଥିଲେ । ଚାରି ଯୁବକଙ୍କୁ ଅକଥନୀୟ ନିର୍ଯାତନା ମଧ୍ୟ ଦିଆଯାଇଥିବା ସେମାନେ ଅଭିଯୋଗ କରିଛନ୍ତି । ଚାରି ଜଣଙ୍କ ମଧ୍ୟରୁ ଜଣେ ଯୁବକ ଖସିଆସି ତହସିଲ କାର୍ଯ୍ୟାଳୟରେ ପହଞ୍ଚି ଅପହରଣ ବିଷୟ କହିଥିଲେ । ଖବର ପାଇ କେ.ନୂଆଗାଁ ଥାନା ପୋଲିସ ପହଞ୍ଚି ଉକ୍ତ କୁଡ଼ିଆରୁ ସମସ୍ତ ଯୁବକକୁ ଉଦ୍ଧାର କରିଥିଲା । ଏହି ଅପହରଣ ଘଟଣାରେ କିଛି ଯୁବକକୁ ଅଟକ ରଖି ତଦନ୍ତ ଜାରି ରଖିଛି ପୋଲିସ ।
