ଭୁବନେଶ୍ବର,,(ବାଘୁଆବାର୍ତ୍ତା) : ଓଡ଼ିଶା ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ୨୦୨୧ର ବାର୍ଷିକ ହାଇସ୍କୁଲ ସାର୍ଟିଫିକେଟ ପରୀକ୍ଷା (ରେଗୁଲାର ଓ ଏକ୍ସରେଗୁଲାର) ସୂଚୀ ପ୍ରକାଶ ପାଇଛି । ମାଟ୍ରିକ ପରୀକ୍ଷା ମେ ୩ରୁ ଆରମ୍ଭ ହୋଇ ୧୫ ତାରିଖ ପର୍ଯ୍ୟନ୍ତ ଚାଲିବ । ଉଭୟ ରେଗୁଲାର ଓ ଏକ୍ସ-ରେଗୁଲାର ପରୀକ୍ଷା ଗୋଟିଏ ସିଟିଂରେ ଓ ଗୋଟିଏ ପ୍ରଶ୍ନପତ୍ରରେ ହେବ । ପରୀକ୍ଷା ସକାଳ ୮ଟାରୁ ଆରମ୍ଭ ହୋଇ ୧୦ଟା ପର୍ଯ୍ୟନ୍ତ ଚାଲିବ । ପ୍ରଥମ ଦିନ ଅର୍ଥାତ ମେ ୩ ତାରିଖରେ ପ୍ରଥମ ଭାଷା (ଓଡ଼ିଆ କିମ୍ବା ଅନ୍ୟ ଭାଷା), ମେ ୫ରେ ଦ୍ବିତୀୟ ଭାଷା (ଇଂରାଜୀ କିମ୍ବା ଅନ୍ୟ ଭାଷା), ମେ ୭ରେ ତୃତୀୟ ଭାଷା (ହିନ୍ଦୀ କିମ୍ବା ଅନ୍ୟ ଭାଷା), ମେ ୮ରେ ତୃତୀୟ ଭାଷା (ସଂସ୍କୃତ), ମେ ୯ରେ ଭିଜୁଆଲ ଆର୍ଟସ ପ୍ରାକ୍ଟିକାଲ, ମେ ୧୦ରେ ଗଣିତ, ମେ ୧୨ରେ ବିଜ୍ଞାନ, ମେ ୧୫ରେ ସାମାଜିକ ବିଜ୍ଞାନ ପରୀକ୍ଷା ହେବ । ପରୀକ୍ଷା ଦିନ ୭ଟା ୪୫ ମିନିଟରେ ଉଭୟ ଭାଗ-୧( ବସ୍ତୁନିଷ୍ଠ ବା ଅବଜେକ୍ଟିଭ) ଓ ଭାଗ-୨ (ବର୍ଣ୍ଣନାତ୍ମକ ବା ସବଜେକ୍ଟିଭ) ପ୍ରଶ୍ନପତ୍ର ବଣ୍ଟାଯିବ । ଭାଗ-୧ ପରୀକ୍ଷା ସକାଳ ୮ଟାରୁ ୯ଟା ଓ ଭାଗ-୨ ୯ଟାରୁ ୧୦ଟା ପର୍ଯ୍ୟନ୍ତ ଅନୁଷ୍ଠିତ ହେବ । ପରୀକ୍ଷାର୍ଥୀମାନେ ଭାଗ-୧ର ଉତ୍ତର ଓଏମଆର ସିଟରେ ଓ ଭାଗ-୨ର ଉତ୍ତର ପ୍ରଶ୍ନପତ୍ରରେ ଥିବା ଖାଲି ସ୍ଥାନରେ ଲେଖିବେ। ବିଜ୍ଞାନ ଓ ସାମାଜିକ ବିଜ୍ଞାନ ବିଷୟ ପାଇଁ ରେଗୁଲାର ପରୀକ୍ଷାର୍ଥୀ ନୂଆ ପାଠ୍ୟକ୍ରମ ଓ ଏକ୍ସ-ରେଗୁଲାର ପରୀକ୍ଷାର୍ଥୀ ପୁରୁଣା ପାଠ୍ୟକ୍ରମ ଅନୁସାରେ ପରୀକ୍ଷା ଦେବେ ।
