ଆନନ୍ଦପୁର, (ବାଘୁଆବାର୍ତ୍ତା): ବୈତରଣୀ ନଦୀର ସୁନାମୁନି ଘାଟରୁ ପଥର ବଥର ବନ୍ଧା ଅବସ୍ଥାରେ ମହିଳାଙ୍କ ମୃତଦେହ ଉଦ୍ଧାର । ଆନନ୍ଦପୁର ଥାନା ବୈତରଣୀ ନଦୀର ସୁନାମୁନି ଘାଟରୁ ମିଳିଛି ମୃତଦେହ । ଅଗ୍ନିଶମ ବିଭାଗ ସହାୟତାରେ ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଛି ପୋଲିସ୍ । ମୃତ ମହିଳାଙ୍କ ମିଳିନାହିଁ ପରିଚୟ । ଶନିବାର ରାତିରେ ସ୍ଥାନୀୟ କିଛି ଲୋକ ନଦୀ କୁଳକୁ ଯାଇଥିବା ସମୟରେ ପାଣି ଉପରକୁ କେବଳ ଏକ ହାତ ବାହରକୁ ଥିବା ଦେଖିଥିଲେ । କେହି ପାଣିରେ ବୁଡି ଯାଇଥିବା ସଂଦେହ କରି ପୋଲିସ୍ କୁ ଖବର ଦେଇଥିଲେ । ଆନନ୍ଦପୁର ପୋଲିସ୍ ସେଠାରେ ପହଁଞ୍ଚି ବିଳମ୍ବିତ ରାତିରେ ଅଗ୍ନିଶମ ବିଭାଗ ସହାୟତାରେ ମୃତଦେହ ଉଦ୍ଧାର ପରେ ଦୃଶ୍ୟ କିଛି ଭିନ୍ନ ରହିଥିଲା । ମହିଳାଙ୍କ ଅଣ୍ଟାରେ ପଥର ବନ୍ଧା ହୋଇଥିବାବେଳେ ଗୋଟିଏ ହାତ ମଧ୍ୟ ଶରୀର ସହ ବନ୍ଧା ହୋଇଥିବା ଦେଖିବାକୁ ମିଳିଛି । କେହି ମହିଳାଙ୍କୁ ହତ୍ୟା କରି ହାତ ବାନ୍ଧିବାସହ ଶରୀରକୁ ପଥରରେ ବାନ୍ଧି ନଦୀକୁ ଫିଙ୍ଗି ଦେଇଥିବା ସନ୍ଦେହ କରି ଅଧିକ ତଦନ୍ତ ଚଳାଇଛି ପୋଲିସ୍ ।
