ନୟାଗଡ଼, (ବାଘୁଆବାର୍ତ୍ତା) ନୟାଗଡ଼ ଜିଲ୍ଲା ଓଡ଼ଗାଁ ବନାଞ୍ଚଳ ଭୁବନେଶ୍ୱର-ଭଞ୍ଜନଗର ୨୧ ନଂ ରାଜ୍ୟ ରାଜପଥ ଅନ୍ତର୍ଗତ ରଙ୍ଗଣୀପାଟଣା ଗୋଡିପଲ୍ଲୀ ଗ୍ରାମ ମୁଖ୍ୟ ଛକରୁ ଓଡ଼ଗାଁ ବନବିଭାଗ ଲକ୍ଷାଧିକ ମୁଲ୍ୟର ଶାଳ ଗଣ୍ଡି ଓ ସାଇଜ ଜବତ କରିବା ସହ ଜଣଙ୍କୁ ଗିରଫ କରିଛି।ଗିରଫ ଅଭିଯୁକ୍ତ କୋରପିଠା ଗ୍ରାମ ନୂଆସାହିର ପବିତ୍ର ସେଠୀ (୨୬) ବୋଲି ଜଣାପଡିଛି ଓ ବନବିଭାଗ ଚୋରା ଚାଲାଣରେ ବ୍ୟବହୃତ ଏକ ଧଳା ରଙ୍ଗର ବୋଲେରୋ ପିକଅପକୁ ମଧ୍ୟ ଜବତ କରିଛି।ସୂଚନା ଅନୁଯାୟୀ ଆଜି ସକାଳ ୧୦ ଘଟିକା ୩୦ ମିନିଟ ସମୟରେ ଓଡ଼ି୦୨ସିଜେ୬୮୬୨ ନଂ ବିଶିଷ୍ଟ ଏକ ପିକଅପ ମାଧ୍ୟମରେ ଶାଳ କାଠ ଚୋରାଚାଲାଣ ହେଉଥିବା ନେଇ ବିଶେଷ ସୂତ୍ରରୁ ଖବର ପାଇ ଓଡ଼ଗାଁ ବନାଞ୍ଚଳ ଅଧିକାରୀ ନିଖିଲେଶ ମଲ୍ଲିକଙ୍କ ନିର୍ଦ୍ଦେଶକ୍ରମେ ଓଡ଼ଗାଁ ବନପାଳ ସରିତା ବରାଳ,ଫରେଷ୍ଟଗାର୍ଡ ସୌମ୍ୟରଞ୍ଜନ ଦଳେଇ, ଉଦ୍ଧବ ପ୍ରଧାନ ପ୍ରମୁଖ ୨୧ ନଂ ରାଜ୍ୟ ରାଜପଥ ଅନ୍ତର୍ଗତ ରଙ୍ଗଣୀପାଟଣା ଠାରୁ ପିଛା କରି ଗୋଡିପଲ୍ଲୀ ମୁଖ୍ୟଛକ ଠାରେ ଅଟକାଇବାରେ ସଫଳ ହୋଇଥିଲେ।ବନବିଭାଗର ଗାଡିକୁ ଦେଖି ଅଭିଯୁକ୍ତ ନିଜର ଗାଡିର ଗତିକୁ ବଢାଇବା ସହ ଚମ୍ପଟ ମାରିବାକୁ ଉଦ୍ୟମ କରିଥିଲେ ସୁଦ୍ଧା ବିଫଳ ହୋଇଥିଲେ।ଚଢ଼ାଉ ସମୟରେ ୯ ଗୋଟି ବୃହତ ଶାଳ ଗଣ୍ଡି ଓ ସାଇଜ କାଠ ଜବତ କରାଯାଇଛି।ଯାହାର ଆନୁମାନିକ ମୂଲ୍ୟ ୨ ଲକ୍ଷର ଉର୍ଦ୍ଧ୍ବ ହେବ ବୋଲି ବନ ବିଭାଗ ପକ୍ଷରୁ ସୂଚନା ମିଳିଅଛି।ଏହି ଚଢ଼ାଉରେ ବନବିଭାଗର ପ୍ରୋଟେକ୍ସନ ସ୍କାର୍ଡ ମଧ୍ୟ ସାମିଲ ଥିଲେ।
