ନୟାଗଡ଼, (ବାଘୁଆବାର୍ତ୍ତା): ଜିଲ୍ଲା ନାଟ୍ୟ ନିର୍ଦ୍ଦେଶକ ସଂଘ ପକ୍ଷରୁ ଆଜି ଇଟାମାଟି ଆର୍ଶୀବାଦ କଲ୍ୟାଣ ମଣ୍ଡପଠାରେ ଏକ ସାଂଗଠନିକ ସଭା ଅନୁଷ୍ଠିତ ହୋଇଯାଇଛି । ଆୟୋଜିତ ସଭାରେ ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତି କରଣ, ମତ୍ସ୍ୟ ଓ ପ୍ରାଣୀ ସଂପଦ ଏବଂ ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ ମୁଖ୍ୟ ଅତିଥି ଭାବେ ଯୋଗ ଦେଇ କଳା ଏବଂ ସଂସ୍କୃତି ପ୍ରେମୀ ମଣିଷଙ୍କୁ ଏକାଠି କରିବା ପାଇଁ ଏକ ମାଧ୍ୟମର ଆବଶ୍ୟକତା ରହିଛି ବୋଲି କହିଥିଲେ । ଅନୁଷ୍ଠାନ ବା ସଂଗଠନ ଏହି ଦାୟିତ୍ୱ ନିର୍ବାହ କରୁଛି ଏଥିପାଇଁ ମନ୍ତ୍ରୀ ଆୟୋଜକଙ୍କୁ ଧନ୍ୟବାଦ ଦେଇଥିଲେ । ନାଟ୍ୟ ନିଦ୍ଦେର୍ଶକ ସୁବାସ କଅଁରଙ୍କ ଦ୍ୱାରା ଆବହକତ୍ୱରେ ଆୟୋଜିତ ଏହି ସମ୍ମିଳନୀରେ ସମ୍ମାନିତ ଅତିଥି ଭାବେ ଯାତ୍ର ଜଗତର ପ୍ରଖ୍ୟାତ ଖଳନାୟକ ଦୈତାରୀ ପଣ୍ଡା ଯୋଗ ଦେଇଥିବା ବେଳେ ଅନ୍ୟମାନଙ୍କ ମଧ୍ୟରେ ନାଟ୍ୟକାର ଶରତ ଚନ୍ଦ୍ର ଆଚାର୍ଯ୍ୟ, ଡ. ବିଜୟ କୁମାର ଚୈାଧୁରୀ, ସାହିତ୍ୟ ଏକାଡେମୀ ସଦସ୍ୟ ଅଶୋକ କୁମାର ନାୟକ, ବରିଷ୍ଠ ଅଭିନେତା ଜଗନ୍ନାଥ ପଣ୍ଡା, ସମାଜସେବୀ ଅଜିତ ପ୍ରସାଦ ସାହୁ, ପୂର୍ବତନ ନଗରପାଳ ଗୁରୁପ୍ରସାଦ ଜେନା ପ୍ରମୂଖ ଯୋଗ ଦେଇଥିଲେ । ନାଟକରେ ଉଲ୍ଲେଖନୀୟ ଅବଦାନ ପାଇଁ କଂଣ୍ଠଶିଳ୍ପୀ, ରୂପକାର. ସଂଗୀତ ନିର୍ଦ୍ଦେଶକ, ଚିତ୍ରାଳୟ, ପ୍ରତିଷ୍ଠାତାମାନଙ୍କୁ ସମ୍ବର୍ଦ୍ଧିତ କରାଯାଇଥିଲା ।
