ନୟାଗଡ, (ବାଘୁଆବାର୍ତ୍ତା); ନୟାଗଡ଼ ପାଇଁ ଚଳଚଞ୍ଚଳ ହୋଇପଡ଼ିଛି ଦେବାଦେବୀ ପୀଠ । ନୟାଗଡ଼ ସହର ସମେତ ଆଖାପାଖରେ ଥିବା ସମସ୍ତ ଦେବାଦେବୀ ପୀଠରେ ଆଜି ଭକ୍ତଙ୍କ ଗହଳୀ ଦେଖିବାକୁ ମିଳିଛି । ନୟାଗଡ଼ ସହରରେ ଅବସ୍ଥିତ ଦକ୍ଷିଣକାଳୀପୀଠ, ଖଣ୍ଡପଡ଼ା ରାସ୍ତାରେ ଥିବା ହନୁମାନ ମନ୍ଦିର, ତ୍ରିନାଥଛକଠାରେ ଅବସ୍ଥିତ ରାମ ମନ୍ଦିରରେ ଭିଡ଼ ଦେଖା ଯାଇଛି । ସେହିଭଳି ଭାବେ ମାଳିସାି ଗତିଶ୍ୱତ ପୀଠ ଏବଂ କଞ୍ଚନବିଲି ବାଲୁଙ୍କେଶ୍ୱର ପୀଠରେ ମଧ୍ୟ ଗହଳୀ ଦେଖିବାକୁ ମିଳିଛି । ଖଣ୍ଡପଡ଼ା ବ୍ଲକ ଅଧିନ ସମସ୍ତ ପୁରପଲ୍ଲୀରେ ଅବସ୍ଥିତ ଦେବାଦେବୀ ପୀଠ ଗୁଡ଼ିକ ପବିତ୍ର ମକରଯାତ୍ରା ଉପଲକ୍ଷେ ଚଳଚଂଚଳ ହୋଇଉଠିଛି । ଦେବାଦେବୀ ପୀଠ ଗୁଡ଼ିକରେ ପୂଜାର୍ଚ୍ଚନା ନିମନ୍ତେ ପ୍ରତ୍ୟୁଷରୁ ଶ୍ରଦ୍ଧାଳୁଙ୍କ ସମାଗମ ହୋଇଥିଲା । ଖଣ୍ଡପଡ଼ା ସହରର ପ୍ରମୁଖ ଶୈବପୀଠ ଗୁଡ଼ିକରେ ଏ ନେଇ ରୀତିନୀତି ଅନୁଯାୟୀ ପୂଜାପାଠ, ହୋମଯଜ୍ଞ ଆଦି ମାଙ୍ଗଳିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ପ୍ରତ୍ୟେକ ପୀଠରେ ବିଗ୍ରହମାନଙ୍କୁ ମକର ଚାଉଳ ଭୋଗ ଲାଗି କରାଯାଇଥିଲା । ଖଣ୍ଡପଡା ସହରର ମା’ ବାଉରୀ ଠାକୁରାଣୀଙ୍କ ପୀଠ, କଳସପଲ୍ଲୀ ସ୍ଥିତ ପଂଚମୁଖି ହନୁମାନଙ୍କ ପୀଠ, ୨ ନଂ ୱାର୍ଡ଼ସ୍ଥିତ ସଙ୍କଟମୋଚନ ହନୁମାନଙ୍କ ପୀଠରେ ମକର ପର୍ବ ଧୁମଧାମରେ ଆରମ୍ଭ ହୋଇଛି । ବିଭିନ୍ନ ସ୍ଥାନରେ ଆୟୋଜିତ ମକର ମେଳାକୁ ଉପଭୋଗ କରିବା ନିମନ୍ତେ ଆଖପାଖ ଅଂଚଳରୁ ଜନସାଧାରଣଙ୍କ ସମାଗମ ହୋଇଥିଲା ।
