ଭୁବନେଶ୍ୱର, (ବାଘୁଆବାର୍ତ୍ତା): ୟୁଟ୍ୟୁବର ଶଙ୍କର ପୁଣି ଜେଲ ଯାଇଛନ୍ତି । ଏଥର ତାଙ୍କୁ ସାଇବର ଓ ଅର୍ଥନୈତିକ ଅପରାଧ ଥାନା ପୁଲିସ ଗିରଫ କରିଛି । ସାଇବର ଥାନା ଏସିପି ଅଞ୍ଜନା ଟୁଡୁ କହିଛନ୍ତି, ଏକ ରାଜନୈତିକ ଦଳର ଜଣେ ନେତ୍ରୀଙ୍କ ଚରିତ୍ର ସଂହାର କରିବା ଅଭିଯୋଗରେ ତାଙ୍କୁ ବାଲେଶ୍ୱରରୁ ଗିରଫ କରାଯାଇଛି । ଶଙ୍କରଙ୍କ ପୂରା ନାଁ ଉମାଶଙ୍କର ପାଣିଗ୍ରାହୀ ଓରଫ ଓମ୍ ଓରଫ ସାରନ । ଘର ବାଲେଶ୍ୱର ଜିଲ୍ଲା ସିମୁଳିଆ ଥାନା ଅଧୀନ ବରିରେ । ସେ ବରମୁଣ୍ଡା ଶତାଦ୍ଦୀ ନଗରର ସ୍ୱାଇଁ କଲୋନିରେ ରହୁଛନ୍ତି । ତାଙ୍କର ‘ପିଟିସି (ପାଣିଗ୍ରାହୀ ଟେଲି ମିଡିଆ କମ୍ପୁନିକେସନ) ଓଡି଼ଶା’ ନାଁରେ ତା’ର ଏକ ୟୁଟ୍ୟୁବ୍ ଚ୍ୟାନେଲ୍ ଅଛି । ଉକ୍ତ ଚ୍ୟାନେଲରେ ଅଧିକାଂଶ ପୋଷ୍ଟରେ ଅଶ୍ଲୀଳ ଭାଷା ବ୍ୟବହାର କରାଯାଏ । ସେ ଅନେକ ପୋଷ୍ଟରେ ନାରୀମାନଙ୍କୁ ଅପମାନିତ କରିବା ଭଳି ଶବ୍ଦ ଉଚ୍ଚାରଣ କରିଥାନ୍ତି । କିଛି ଦିନ ତଳେ ସେ ଉକ୍ତ ଚ୍ୟାନେଲରେ ପୁଲିସ ଓ ଗଣମାଧ୍ୟମକୁ ବେଶ୍ୟା ଦର୍ଶାଇ ଏକ ରୋଷ୍ଟ ଭିଡିଓ ଅପଲୋଡ କରିଥିଲେ । ଗତ ୧୨ ତାରିଖରେ ଜଣେ ନେତ୍ରୀ ସାଇବର ଥାନାରେ ତାଙ୍କ ନାଁରେ ଅଭିଯୋଗ କରିଥିଲେ । ନେତ୍ରୀଙ୍କ ଅଭିଯୋଗ ମୁତାବକ, ସେ ଉକ୍ତ ରୋଷ୍ଟ ଭିଡିଓକୁ ତୀବ୍ର ପ୍ରତିବାଦ କରିଥିଲେ । ପୋଷ୍ଟ ତଳେ ଏକ କମେଣ୍ଟ ଲେଖିଥିଲେ । ପୁଲିସ ଓ ଗଣମାଧ୍ୟମ ବିରୋଧରେ ଏଭଳି ଅଶ୍ଲୀଳ ଭାଷା ବ୍ୟବହାର ନ କରିବାକୁ ତାଗିଦ୍ କରିଥିଲେ । ଶଙ୍କରଙ୍କ ବିରୋଧରେ ଗଣମାଧ୍ୟମରେ ମଧ୍ୟ ବିଷ ଉଗାରିଥିଲେ । ଏଥିରେ ଶଙ୍କର ଆହୁରି ରାଗିଯାଇଥିଲେ । ସମ୍ପୃକ୍ତ ନେତ୍ରୀଙ୍କ ବିରୋଧରେ ଏକ ରୋଷ୍ଟ ଭିଡିଓ ଅପଲୋଡ କରିଥିଲେ । ସେଥିରେ ନେତ୍ରୀଙ୍କୁ ଅଶ୍ରାବ୍ୟ ଭାଷାରେ ଗାଳି କରିବା ସହ ତାଙ୍କର ଚରିତ୍ର ସଂହାର କରିଥିଲେ । ଅଞ୍ଜନା କହିଛନ୍ତି, ସୋସିଆଲ ମିଡିଆରେ ଅନ୍ୟର ଚରିତ୍ର ସଂହାର କରିବା ଶଙ୍କରର ପୁରୁଣା ରୋଗ । ରାତାରାତି ଚର୍ଚ୍ଚା ସାଉଁଟିବା ଓ ୟୁ-ଟ୍ୟୁବରୁ ଟଙ୍କା କମାଇବା ଚକ୍କରରେ ସେ ଏଭଳି କରିଥାଏ । ପୂର୍ବରୁ ଓଡି଼ଶାର ବିଭିନ୍ନ ଜିଲ୍ଲାର ଝିଅମାନଙ୍କୁ ଖରାପ ଦର୍ଶାଇ ଏକ ଗୀତ ଅପଲୋଡ କରିଥିଲା । ଏହାଛଡ଼ା ହାଇ-ପ୍ରୋଫାଇଲ ଯୁବତୀମାନଙ୍କ ସହ ସୋସିଆଲ ମିଡିଆରେ ବନ୍ଧୁତା ସ୍ଥାପନ କରି ନିକଟତର ହେବା ପାଇଁ ଚେଷ୍ଟା କରେ । ଯଦି କେହି ତାକୁ ବିରୋଧ କରେ, ତା’ ନାଁରେ ୟାଡୁ ସିଆଡୁ ଲେଖି ସୋସିଆଲ ମିଡିଆରେ ପୋଷ୍ଟ କରି ଚରିତ୍ର ସଂହାରରେ ଲାଗିଯାଏ । ବାଲେଶ୍ୱର ସିମୁଳିଆ ଥାନାରେ ୨ଟି ମାମଲା ଅଛି । ଭୁବନେଶ୍ୱର ମହିଳା ଥାନାରେ ମଧ୍ୟ ଗୋଟିଏ ଅଭିଯୋଗ ରହିଛି ।
ନାରୀନେତ୍ରୀଙ୍କ ଚରିତ୍ର ସଂହାର, ୟୁଟ୍ୟୁବର ଶଙ୍କର ଜେଲ ଗଲେ
