ନୟାଗଡ଼଼, (ବାଘୁଆବାର୍ତ୍ତା): ଦୀର୍ଘକାଳୀନ ସଂଗ୍ରାମ ଫଳରେ ଭାରତ ବର୍ଷର ଶ୍ରମିକ ଶ୍ରେଣୀ, କୃଷକ ସମାଜ, ଯେଉଁ ଅଧିକାର ହାସଲ କରିଥିଲେ, କରୋନା ଆଘାତ କାଳୀନ ପରିସ୍ଥିତିର ସୁଯୋଗ ନେଇ କେନ୍ଦ୍ର ସରକାର ସେ ଅଧିକାରକୁ ଚଂଚକତାର ସହିତ ଅପହରଣ କରିଛନ୍ତି । ତାହାର ପ୍ରତିବାଦରେ ସମସ୍ତ ସର୍ବ ଭାରତୀୟ ଶ୍ରମିକ ସଂଗଠନ, କୃଷକ ସଂଗଠନ, କର୍ମଚାରୀ ସଂଗଠନ, ବ୍ୟାଙ୍କ ବୀମା ଭଳି ଆର୍ଥିକ ସଂଗଠନ, ୟୁନିୟନ୍ ମାନଙ୍କର ଆହ୍ୱାନ କ୍ରମେ ଆସନ୍ତା ନଭେମ୍ବର ୨୬ ସର୍ବଭାରତୀୟ ସାଧାରଣ ଧର୍ମଘଟକୁ ସଂଭାନ୍ତ କରଣରେ ସଫଳ କରିବା ପାଇଁ ଆଜି ଶରଣକୂଳଠାରେ ସଂଗଠିତ ଗଣକନ୍ଭେସନ୍ରେ ନିଷ୍ପତ୍ତି ଗ୍ରହଣ କରାଯିବା ସହ ସାଧାରଣ ଲୋକେ ଏଥିରେ ସାମିଲ ହେବାକୁ ଆହ୍ୱାନ ଦିଆ ଯାଇଛି । କେନ୍ଦ୍ର ସରକାର ଯେଭଳି ୪୪ଟି ଶ୍ରମ ଆଇନକୁ ବାତିଲ କରି ୪ଟି ନିଷ୍କ୍ରିୟ କୋଡ୍ରେ ପରିଣତ କରିଛନ୍ତି, କୃଷି ସଂସ୍କାର ଆଳରେ କର୍ପୋରେଟ କୃଷି ଓ କୃଷି ଅମଳର ମହଜୁଦ୍ କାରୀ କଳାବଜାରୀ ମାନଙ୍କୁ ଅଧିକ ପ୍ରୋତ୍ସାହିତ କରିଛନ୍ତି । ଅତ୍ୟବଶ୍ୟକ ଖାଉଟି ଆଇନକୁ ବାତିଲ କରିଛନ୍ତି । ବେକାରୀ ବୃଦ୍ଧି ଓ ଦରଦାମ ବୃଦ୍ଧିର ବାଟ ଖୋଲିଛନ୍ତି, ତାହାର ପ୍ରତିରୋଧ ପାଇଁ ଏହି ଆନ୍ଦୋଳନକୁ ସଫଳ କରିବା ପାଇଁ ଆଲୋଚକମାନେ ଆଜି ବୈଠକରେ ଆହ୍ୱାନ ଦେଇଛନ୍ତି । କୃଷକ ନେତା ପବିତ୍ର ଇନ୍ଦ୍ରଜିତ୍ଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କନ୍ଭେସନ୍ରେ ଶ୍ରମିକ ଓ କୃଷକ ନେତା ବିଶ୍ୱନାଥ ମହାପାତ୍ର, ଗୋଲକ ବିହାରୀ ମୁଦୁଲୀ, କୃଷ୍ଣଚନ୍ଦ୍ର ମହାପାତ୍ର, ସରୋଜ ନାୟକ, ଆଲୋକ ପ୍ରଧାନ, ଜ୍ୟୋତିପ୍ରଭା ଜେନା, ବିଶ୍ୱନାଥ ପଟ୍ଟନାୟକ, ଭାଗୀରଥି ସ୍ୱାଇଁ, ବିମଳ କୁମାର ଦାଶ, ଧିରେନ ପାତ୍ର, ଉର୍ମୀଳା ଦେବୀ, ବାସନ୍ତି ଦେବୀ, ଉତ୍ସବ ନାୟକ ପ୍ରମୂଖ ଆଲୋଚନାରେ ଭାଗ ନେଇଥିଲେ ।
