ଖଣ୍ଡପଡ଼ା,(ବାଘୁଆବାର୍ତ୍ତା): ‘ବାୟୁ ଗଲେ ପଛ ଉସୁ ବାସିଆ’ ନୀତିରେ ଚାଲିଛି ଖଣ୍ଡପଡ଼ା ପୁଲିସ । ସୂଚନାନୁସାରେ, ଖଣ୍ଡପଡ଼ା ଓ ଗଣିଆ ଅଂଚଳରୁ ସୁଦୁର ପଶ୍ଚିମବଙ୍ଗ ଅଂଚଳକୁ ଚୋରାରେ ଗୋ ଚାଲାଣ କରୁଥିବା ଗାଡିଗୁଡିକୁ ଖଣ୍ଡପଡ଼ା ଥାନା ଓ କଂଟିଲୋ ଫାଣ୍ଡି ପୋଲିସ ମିଳିତ ଭାବେ ଚଢାଉ କରି ଗତ ୩ମାସ ତଳେ ଜବତ କରିଥିଲେ । ପୋଲିସ ଦ୍ୱାରା ଜବତ ୭ଗୋଟି ଗୋରୁ ବୋଝେଇ ଟ୍ରକ କଂଟିଲୋ ଫାଣ୍ଡି ପରିସରରେ ଏବେ ପଡି ରହି ଖତ ଖାଉଛି । ପୋଲିସ ଏ ସଂପର୍କରେ ଏକ ମାମଲା ରୁଜୁ କରି ଘଟଣାର ଅନୁସନ୍ଧାନ ଜାରି ରଖିଥିବା ନେଇ ସୂଚନା ଦେଉଥିଲେ ହେଁ ଅଦ୍ୟାବଧି ତଦନ୍ତରେ ପାଦେ ହେଲେ ଆଗେଇନଥିବା ଜଣାପଡିଛି । ଗୋ ଚାଲାଣ ର୍ୟାକେଟ ପଛରେ ଥିବା ମାଫିଆମାନଙ୍କୁ ପୋଲିସ ଅଦ୍ୟାବଧି ଗିରଫ କରି ପାରିନଥିବାରୁ ପୋଲିସର କାର୍ଯ୍ୟଶୈଳୀ ଓ କାର୍ଯ୍ୟଦକ୍ଷତାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟିହୋଇଛି । ଗୋରୁ ବୋଝେଇ ହୋଇଥିବା ୭ଟି କଂଟେନରକୁ ପୋଲିସ ଜବତ କରିଥିବାବେଳେ ମାତ୍ର ଜଣେ ଡ୍ରାଇଭର ଓ ହେଲପରକୁ ଗିରଫ କରିବାରେ ସକ୍ଷମ ହୋଇଥିବା ବେଳେ ବାକି ଅନ୍ୟମାନେ ଗଲେ କୁଆଡ଼େ ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ଅପରପକ୍ଷେ ପୋଲିସ ପ୍ରଶାସନର ଉଦାସୀନତା ଗୋରୁ ଚାଲାଣକାରୀ ମାଫିଆମାନଙ୍କୁ ପରୋକ୍ଷରେ ପ୍ରୋତ୍ସାହନ ଯୋଗାଇବ ବୋଲି ସାଧାରଣରେ ଆଲୋଚନା ହେଉଛି । ନୟାଗଡ ଏସ୍ପି ଏଥିପ୍ରତି ଦୃଷ୍ଟିଦେବାକୁ ଦାବିହେଉଛି ।
