୬ ବାଇକ ଜବତ, ୩ ଗିରଫ
ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଟାଉନଥାନା ପୁଲିସ ଏକ ବାଇକ ଚୋରୀ ର୍ୟାକେଟକୁ ଠାବ କରିଥିବା ଜଣାଯାଇଛି । ଏହି ବାଇକ ଚୋରୀ ର୍ୟାକେଟରେ ୩ ଜଣ ଅଭିଯୁକ୍ତଙ୍କୁ ପୁଲିସ ଗିରଫ କରିଛି । ସେମାନଙ୍କ ମଧ୍ୟରେ ଫତେଗଡ଼ ଥାନା ଅନ୍ତର୍ଗତ ପିଠାଖାଇ ଗ୍ରାମର ବସନ୍ତ ନାୟକଙ୍କ ପୁଅ ଅଶୋକ ନାୟକ(୨୭), ବିଜିପୁର ଗ୍ରାମର ବୁଲା ଜେନାଙ୍କ ପୁଅ ସନ୍ତୋଷ ଜେନା (୩୫), ବନମାଳୀପୁର ଗ୍ରାମର ନୀଳକଣ୍ଠ ସାହୁଙ୍କ ପୁଅ ଭଗବାନ ସାହୁ ରହିଥିବା ଜଣାଯାଇଛି । ପୁଲିସଠାରୁ ମିଳିଥିବା ସୂଚନାନୁସାରେ, ଅଶୋକ ଏବଂ ବୁଲା ବାଇକ ଚୋରୀ କରୁଥିବା ବେଳେ ଭଗବାନଙ୍କ ଗ୍ୟାରେଜରେ ଏହାକୁ ଖୋଲି ବିକ୍ରି କରୁଥିଲେ । ଏହି ମାମଲାକୁ ଟାଉନଥାନା ଏସ୍ଆଇ ସ୍ମୃତି ରଂଜନ ମହାନ୍ତି ତଦନ୍ତ କରୁଥିବା ଜଣାଯାଇଛି । ସେମାନଙ୍କଠାରୁ ୬ଟି ବାଇକ ଏବଂ ଦୁଇଟି ଗାଡ଼ିର ଇଂଜିନ ଜବତ ହୋଇଛି । ଆଜି ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯିବା ନେଇ ଥାନା ଅଧିକାରୀ ଜୟଦୀପ ମହାନ୍ତି ସୂଚନା ଦେଇଛନ୍ତି ।
