ଓଡ଼ଗାଁ, (ବାଘୁଆବାର୍ତ୍ତା): ସଂସ୍କୃତ ଭାଷାର ପ୍ରଚାର ଓ ପ୍ରସାର ନିମନ୍ତେ ଲୋକଭାଷା ପ୍ରଚାର ସମିତି ନୟାଗଡ଼ କେନ୍ଦ୍ର ଦ୍ୱାରା ଭିସି ମାଧ୍ୟମରେ ଏକ ୧୦ ଦିନିଆ ସଂସ୍କୃତ ସମ୍ଭାଷଣ ବର୍ଗ ଉଦ୍ଘାଟିତ ହୋଇଯାଇଛି । ଉକ୍ତ କାର୍ଯ୍ୟକ୍ରମରେ ଦଧିବାମନ ସଂ୍ସକୃତ ମହାବିଦ୍ୟାଳୟର ଅଧ୍ୟକ୍ଷ ତଥା ଲୋକଭାଷା ପ୍ରଚାର ସମିତି ନୟାଗଡ଼ କେନ୍ଦ୍ରର ସଭାପତି ଭାବଗ୍ରାହୀ କର ଅଧ୍ୟକ୍ଷତା କରିଥିଲେ । ଶରଣକୂଳ ମହାବିଦ୍ୟାଳୟର ପ୍ରାପ୍ତନ ଅଧ୍ୟକ୍ଷ ତଥା ନୟାଗଡ଼ ସଂସ୍କୃତ ବିକାଶ ପରିଷଦର ଅଧ୍ୟକ୍ଷ ବିଜୟ କୁମାର ରଥ ମୁଖ୍ୟ ଅତିଥି ରୂପେ ଯୋଗ ଦେଇ ସଂସ୍କୃତ ଭାଷାର ପ୍ରାଚୀନତା ଓ ସମସ୍ତ ଭାଷାର ଜନନୀ ବୋଲି କହିଥିଲେ । ବିଶିଷ୍ଟ ଅତିଥି ଭାବେ ଦଶପଲ୍ଲା ମହାବିଦ୍ୟାଳୟର ସଂସ୍କୃତ ବିଭାଗ ମୁଖ୍ୟ ତଥା ନୟାଗଡ଼ ସଂସ୍କୃତ ବିକାଶ ପରିଷଦର ସଂସ୍ପାଦକ ଡ. ରମେଶ କୁମାର ଦାଶ ଯୋଗ ଦେଇ ସଂସ୍କୃତ ଭାଷାର ମହନୀୟତା ବିଷୟରେ ଆଲୋକପାତ କରିଥିଲେ । ରାଜସୁନାଖଳ ମହାବିଦ୍ୟାଳୟର ସଂସ୍କୃତ ଭାଷା ମୁଖ୍ୟ ତଥା ଲୋକଭାଷା ସମିତି ପ୍ରଚାର ସମିତିର ବରିଷ୍ଠ ଉପଦେଷ୍ଟା ସୁରମା ଷଡ଼ଙ୍ଗୀ କାର୍ଯ୍ୟକ୍ରମକୁ ସଂଯୋଜନା କରିଥିବା ବେଳେ ଅଧ୍ୟାପକ ଡ. ସନ୍ତୋଷ କୁମାର ସାହୁ ଅତିଥି ପରିଚୟ ପ୍ରଦାନ କରିଥିଲେ । ଏହି ଭିସି କାର୍ଯ୍ୟକ୍ରମରେ ୮୦ରୁ ଉର୍ଦ୍ଧ୍ୱ ବ୍ୟକ୍ତି ଯୋଗ ଦେଇ ଆଲୋଚନାରେ ଅଂଶ ଗ୍ରହଣ କରିଥିବା ବେଳେ ଅଧ୍ୟାପକ ଭାସ୍କର ଚନ୍ଦ୍ର ସାମନ୍ତରାୟ ଧନ୍ୟଦାନ ଅର୍ପଣ କରିଥିଲେ ।
