ଜାଗାବାଡ଼ିକୁ କେନ୍ଦ୍ର କରି ବଡ଼ଭାଇକୁ ଆକ୍ରମଣ, ସାନଭାଇ ଗିରଫ

ଖଣ୍ଡପଡ଼ା, (ବାଘୁଆବାର୍ତ୍ତା): ଖଣ୍ଡପଡ଼ା ଥାନା ଅଧିନ ଖଳିସାହି ପଂଚାୟତର ଇଚ୍ଛାପୁର ଗ୍ରାମରେ ଜାଗାବାଡ଼ିକୁ କେନ୍ଦ୍ରକରି ରବିବାର ଦିନ ୨ଭାଇଙ୍କ ମଧ୍ୟରେ ଗଣ୍ଡଗୋଳର ସୁତ୍ରପାତ ହୋଇଥିଲା । ବାସଗୃହ ନିର୍ମାଣ ନିମନ୍ତେ ନିଅଁ ଖୋଳା ଯାଉଥିବା ବେଳେ ବ୍ରଜକିଶୋର ପଣ୍ଡାଙ୍କ ସହ ତାଙ୍କ ସାନଭାଇ ରାଜକିଶୋର ପଣ୍ଡା ଓ ପୁଅ ତୋଫାନ ପ୍ରଥମେ ପାଟିତୁଣ୍ଡ କରିଥିଲେ । ପରବର୍ତୀ ସମୟରେ ଏହି ଘଟଣାକୁ କେନ୍ଦ୍ର କରି ମାଡପିଟ ପର୍ଯ୍ୟନ୍ତ କଥା ଯାଇଥିଲା । ରାଜକିଶୋର ଓ ତାଙ୍କ ପତ୍ନୀ ଶିଶୁଳା ପଣ୍ଡା, ପୁଅ ତୋଫାନ ମିଳିତ ହୋଇ ଏକ ଧାରୁଆ ଅସ୍ତ୍ର ସହାୟତାରେ ବ୍ରଜକିଶୋରକୁ ମରଣାନ୍ତକ ଆକ୍ରମଣ କରିବାରୁ ସେ ଗୁରୁତର ଆହତ ହୋଇଥିଲେ । ବାପାଙ୍କୁ ସେମାନଙ୍କ କବଳରୁ ରକ୍ଷା କରିବାକୁ ଯାଇ ବ୍ରଜକିଶୋରଙ୍କ ପୁଅ ମଧ୍ୟ ଆକ୍ରମଣର ଶିକାର ହୋଇଥିବା ଅଭିଯୋଗ ହୋଇଛି । ରକ୍ତ ଜୁଡୁବୁଡୁ ଅବସ୍ଥାରେ ସ୍ଥାନୀୟ ବାସିନ୍ଦା ଘଟଣାସ୍ଥଳରୁ ବାପ ଓ ପୁଅଙ୍କୁ ଉଦ୍ଧାର କରି ଆଶୁଚିକିତ୍ସା ନିମନ୍ତେ ଖଣ୍ଡପଡ଼ା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତୀ କରିଥିଲେ । ଏବେ ସେ ଚିକିତ୍ସିତ ହେଉଥିବା ଜଣାପଡ଼ିଛି । ବ୍ରଜକିଶୋରଙ୍କ ପତ୍ନୀ କଳ୍ପନା ପଣ୍ଡା ଖଣ୍ଡପଡ଼ା ଥାନାରେ ଲିଖିତ ଅଭିଯୋଗ କରିବାରେ ପୁଲିସ ରାଜକିଶୋରକୁ ଗିରଫ କରି ସୋମବାର କୋର୍ଟ ଚାଲାଣ କରିଥିବା ବେଳେ ରାଜ କିଶୋରଙ୍କ ପତ୍ନୀ ଓ ପୁଅ ନାମରେ ବିଭିନ୍ନ ଦଫାରେ ମାମଲା ରୁଜୁ ହୋଇଥିବା ଜଣାଯାଇଛି ।