ପ୍ୟାରିସ, (ବାଘୁଆବାର୍ତ୍ତା): ଆଜି ପ୍ୟାରିସ ଅଲିମ୍ପିକ୍ସର କ୍ଲୋଜିଂ ସେରିମୋନି। କ୍ରୀଡ଼ା ମହାକୁମ୍ଭର ସମାପନ ଉତ୍ସବ। ସମାପନ ସମାରୋହରେ ଭାରତର ଧ୍ଵଜାବାହକ ହେବେ ୨ ଖେଳାଳି। ସୁଟର ମନୁ ଭାକର ଏବଂ ଭାରତୀୟ ପୁରୁଷ ହକିର ଗୋଲକିପର ଶ୍ରୀଜେଶ ତ୍ରିରଙ୍ଗା ଲହରାଇବେ। ଅଲିମ୍ପିକ୍ସରେ ୨୨ ବର୍ଷୀୟା ମନୁ ଭାକର ଚମତ୍କାର ପ୍ରଦର୍ଶନ କରି ଦୁଇଟି ବ୍ରୋଂଜ ପଦକ ହାସଲ କରିଛନ୍ତି। ସେହିପରି ହକିଷ୍ଟାର ଶ୍ରୀଜେଶଙ୍କ ଖେଳ ସମସ୍ତ ଭାରତୀୟଙ୍କ ମନ ମୋହିଛି। ଗୋଲକିପର ଭାବେ ଭାରତକୁ ସେମିଫାଇନାଲ ପର୍ୟ୍ୟନ୍ତ ନେବାରେ ଶ୍ରୀଜେଶଙ୍କ ମୁଖ୍ୟ ଭୂମିକା ରହିିଥିଲା। ହକିରେ ଭାରତୀୟ ଦଳ ବ୍ରୋଂଜ ପଦକ ହାସଲ କରିଛି। ପ୍ୟାରିସ ଅଲିମ୍ପିକ୍ସର ସମସ୍ତ ଇଭେଣ୍ଟ ଗତକାଲି ସୁଦ୍ଧା ସମ୍ପନ୍ନ ହୋଇଛି। ଉଦଯାପନୀ ଉତ୍ସବରେ ଧ୍ଵଜବାହକ ଭାବେ ଚୟନ କରାଯାଇଥିବାରୁ ଏହି ସମ୍ମାନ ଲାଗି ଖୁସି ପ୍ରକଟ କରିଛନ୍ତି ଦୁଇ ଖେଳାଳି। ଭାରତର ଜାତୀୟ ପତାକା ଧରିବା ମୋ ପାଇଁ ଗର୍ବର ବିଷୟ ବୋଲି କହିଛନ୍ତି ଶ୍ରୀଜେଶ। ଅଲିମ୍ପିକ୍ସରେ ନିଜଦେଶ ପାଇଁ ପ୍ରତିନିଧିତ୍ଵ କରିବା ସମସ୍ତ ଖେଳାଳିଙ୍କ ସ୍ଵପ୍ନ ହୋଇଥାଏ ବୋଲି କହିଛନ୍ତି ଶ୍ରୀଜେଶ। ଆଉ ଏହି ସମ୍ମାନର ସ୍ଵତନ୍ତ୍ରତା ସବୁଠାରୁ ଅଲଗା ବୋଲି ସେ କହିଛନ୍ତି। କ୍ଲୋଜିଂ ସେରିମୋନିରେ ଦେଖିବାକୁ ମିଳିବ ରଂଗାରଂଗ କାର୍ୟ୍ୟକ୍ରମ। ହଲିଉଡ ଷ୍ଟାର ଟମ କ୍ରୁସ ଷ୍ଟଣ୍ଟ ପ୍ରଦର୍ଶନ କରିବେ। ଏହାସହ ଆମେରିକୀୟ ଗାୟିକା ବିଲି ଏଲିସ ଓ ଗାୟକ ସ୍ନୁପ ଡଗ ସଂଗୀତ ପରିବେଶ କରିବେ। ବେଶ ରୋମାଞ୍ଚକର ହେବ ଏହି ଉଦଯାପନୀ ଉତ୍ସବ ।
ଆଜି ପ୍ୟାରିସ ଅଲିମ୍ପିକ୍ସର କ୍ଲୋଜିଂ ସେରିମୋନି
