ଗଣିଆ, (ବାଘୁଆବାର୍ତ୍ତା): ଗଣିଆ ବ୍ଲକ ପରିସରରେ ପ୍ରଧାନମନ୍ତ୍ରୀ ଆବାସ ଯୋଜନା ଓ ଭାଗବତ ଟୁଙ୍ଗୀର ଉପକରଣ ବଣ୍ଟନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଅନ୍ୟ ମାନଙ୍କ ମଧ୍ୟରେ ବ୍ଲକ ଅଧ୍ୟକ୍ଷ ଶେଷଦେବ ସ୍ୱାଇଁ, ଜିଲ୍ଲା ପରିଷଦ ସଭ୍ୟ ମହେଶ୍ୱର ମହାରଣା, ବିଡିଓ ସିରିୟାଲ ପଟେଲ, କନ୍ଧମାଳ ସାଂସଦଙ୍କ ଜିଲ୍ଲା ପ୍ରତିନିଧି ସଦାଶିବ ମିଶ୍ର, ଅତିରିକ୍ତ ବିଡିଓ ସରୋଜ କୁମାର ନାୟକଙ୍କ ସମେତ ଲୋକପ୍ରତିନିଧି ଓ ହିତାଧିକାରୀ ଉପସ୍ଥିତ ଥିଲେ । ଗଣିଆ ବ୍ଲକରେ ୬୭ ଜଣଙ୍କୁ କାର୍ଯ୍ୟାଦେଶ ବଣ୍ଟନ କରାଯାଇଥିବା ବେଳେ ସେମାନଙ୍କ ମଧ୍ୟରୁ ଛାମୁଣ୍ଡିଆ ପଞ୍ଚାୟତରେ ୨୮ ଜଣ, କରଡ଼ାପଡ଼ାରେ ୧୫ ଜଣ, କିଶୋରପ୍ରସାଦରେ ୩ ଜଣ ଓ ଆଡ଼ କଟାରେ ୨୧ ଜଣ ଥିବା ଜଣାପଡିଛି । ସେହିପରି ୫ଟି ଗ୍ରାମକୁ ଭାଗବତ ଟୁଙ୍ଗି ପାଇଁ ଉପକରଣ ପ୍ରଦାନ କରାଯାଇଛି । ସେଥିମଧ୍ୟରୁ କିଶୋରପ୍ରସାଦ ପଞ୍ଚାୟତର ପତୁରିଆ, ପାଣ୍ଡରାସିଙ୍ଗା ଓ ପୂର୍ଣ୍ଣଚନ୍ଦ୍ରପୁର, ଛାମୁଣ୍ଡିଆ ପଂଚାୟତର ଇଶ୍ୱରପୁର ଓ ରାସଙ୍ଗର ବସନ୍ତପୁର ଭାଗବତ ଟୁଙ୍ଗିକୁ ମାଇକସେଟ୍ ପ୍ରଦାନ କରାଯାଇଛି । ସରକାରଙ୍କର ଏହି ଜନହିତକର ଯୋଜନା ଯୋଗୁଁ ଓଡିଶାରେ ବୁଡି ଯାଉଥିବା କଳା ପୁଣି ଥରେ ଉଜ୍ଜିବିତ ହୋଇ ପାରିବ ବୋଲି ବିଧାୟକ ଜଣାଇଥିଲେ । ଗଣିଆରେ ଅନେକ କଳାକାର କଳାକୁ ନିଜର ପେଷା ରୂପେ ଆଦରି ଥିଲେ ମଧ୍ୟ କଳାକାର ଭତ୍ତା ପାଇବାରୁ ବଞ୍ଚିତ ହୋଇ ଥିବାରୁ ତାଙ୍କୁ କଳାକାର ଭତ୍ତା ପ୍ରଦାନ କରିବାକୁ ଲୋକ ପ୍ରତିନିଧି ମାନେ ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲେ ।
