ଗଣିଆ, (ବାଘୁଆବାର୍ତ୍ତା): ନଦୀକୁ ଗାଧୋଇବାକୁ ଯାଇ ଗୋଡ଼ ଖସି ଯିବାରୁ ଭରା ନଦୀରେ ଭାସି ଯାଇ ଜଣେ ୭୦ ବର୍ଷ ବୟସ୍କ ବୃଦ୍ଧଙ୍କ ମୃତ୍ୟୁ ଘଟିିଛି । ମୃତକ ଜଣକ ଗଣିଆ ବ୍ଲକ ଛାମୁଣ୍ଡିଆ ପଞ୍ଚାୟତ ଗୋପିନାଥପୁର ଗ୍ରାମର କହ୍ନେଇ ବେହେରା ବୋଲି ଜଣାପଡିଛି । ଘଟଣାରୁ ଜଣାପଡିଛି ଯେ କହ୍ନେଇ ଆଜି ସକାଳ ସମୟରେ ଛାମୁଣ୍ଡିଆରେ ଥିବା ମହାନଦୀ ଘାଟକୁ ଗାଧୋଇବାକୁ ଯାଇଥିଲେ । ଅସାବଧାନତା ବସତଃ ନଦୀରେ ଗୋଡ଼ ଖସି ଯିବାରୁ କହ୍ନେଇ ଭରା ନଦୀରେ ଭାସି ଯାଇଥିଲେ । ନଦୀରେ ସୁଅ ଏତେ ପ୍ରଖର ଥିଲା ଯେ କହ୍ନେଇ ଭାସିଯିବା ପରେ ଆଉ ଦେଖା ଯାଇନଥିଲେ । ଘର ଲୋକ ତାଙ୍କୁ ଖୋଜା ଖୋଜି କରିବା ପରେ ପାଇନଥିଲେ । ଖବରପାଇ ଦମକଳ ଅଧିକାରୀ ସାନନ୍ଦ ଜେନା ଘଟଣାସ୍ଥଳରେ ପହଞ୍ଚି ବୋଟ୍ ସାହାର୍ଯ୍ୟରେ ବହୁତ ଖୋଜାଖୋଜି କରିଥିଲେ । ଦୀର୍ଘ ୪ ଘଣ୍ଟା ଧରି ଦମକଳ ବାହିନୀ ଅକ୍ଲାନ୍ତ ପରିଶ୍ରମ କରିଥିଲେ ସୁଦ୍ଧା ଶବ ମିଳି ପାରି ନଥିଲା । ପରେ ଛାମୁଣ୍ଡିଆ ଠାରୁ ୬ କିଲୋମିଟର ଦୂର ଗଣିଆ ବ୍ଲକ ରାସଙ୍ଗ ମହାନଦୀ ଘାଟରେ ଗଛ ବୁଦା ମୂଳରେ କହ୍ନେଇଙ୍କ ଶବ ଲାଗିଥିôବା କିଛି ଲୋକ ଦେଖିବାକୁ ପାଇଥିଲେ । ତେବେ ଦମକଳ ବାହିନୀଙ୍କୁ ଖବର ଦେବା ପରେ ସେମାନେ ବୋଟ୍ ସାହାର୍ଯ୍ୟରେ ସେଠାକୁ ଯାଇ ଶବଟିକୁ ରାଉତପଡ଼ା ଘାଟ ପର୍ଯ୍ୟନ୍ତ ଆଣିଥିଲେ । ପରେ ସେଠାରୁ ଦମକଳ ସାହାର୍ଯ୍ୟରେ ତାକୁ ଗଣିଆ ମେଡିକାଲକୁ ଅଣାଯିବା ପରେ ଡାକ୍ତର ମୃତ ଘୋଷଣା କରିଥିଲେ । ଗଣିଆ ଥାନା ଅଧିକାରୀ ଜୟପ୍ରକାଶ ପରିଡ଼ା ଘଟଣାସ୍ଥଳରେ ପହଞ୍ଚି ଶବଟିକୁ ଜବତ କରିବା ସହିତ ବ୍ୟବଛେଦ ପାଇଁ ଦଶପଲ୍ଳା ମେଡିକାଲକୁ ପଠାଇଥିବା ଜଣାଯାଇଛି ।
