ନୟାଗଡ଼, (ବାଘୁଆବାର୍ତ୍ତା): ରାଜ୍ୟରେ ଆଜି ସବୁ ଜିଲ୍ଲାର ବିଜେଡି ଯୁବ ସଭାପତିଙ୍କ ନାମ ଘୋଷଣା କରାଯାଇଛି । ଏହି ଅବସରରେ ନୟାଗଡ଼ ଜିଲ୍ଲା ଯୁବ ବିଜେଡି ସଭାପତି ଭାବେ ପୁଣି ଥରେ ରମେଶ କୁମାର ସାହୁଙ୍କ ନାମ ଘୋଷଣା କରାଯାଇଛି । ପୂର୍ବରୁ କାଳିକାପ୍ରସାଦ ସରପଂଚ ଭାବେ କାର୍ଯ୍ୟକରି ଶ୍ରୀଯୁକ୍ତ ସାହୁ ନିଜର କାର୍ଯ୍ୟ ଦକ୍ଷତା ପ୍ରତିପାଦିତ କରିଥିବା ବେଳେ ଗତଥର ଜିଲ୍ଲା ଯୁବ ବିଜେଡି ସଭାପତି ଭାବେ ଜିଲ୍ଲାର ସାଂଗଠନିକ କାର୍ଯ୍ୟ ସୂଚାରୁ ଋପେ ତୁଲାଇ ଆସିଥିଲେ । ଫଳରେ ଦଳ ପକ୍ଷରୁ ପୁଣି ଥରେ ତାଙ୍କ ଉପରେ ଆସ୍ଥା ପ୍ରକଟ କରାଯାଇଛି । ଏବେ ସେ ଦଳକୁ ମଜବୁତ କରିବା ପାଇଁ ଆହୁରି ଅକ୍ଲାନ୍ତ ପରିଶ୍ରମ କରିବେ ବୋଲି କହିଛନ୍ତି । ତାଙ୍କ ଉପରେ ଦଳ ପୁଣିଥରେ କାର୍ଯ୍ୟଭାର ଦେଇଥିବାରୁ ସେ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ନୟାଗଡ଼ ବିଧାୟକ ତଥା ରାଜ୍ୟ ସରକାରଙ୍କ କୃଷି ଓ ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ, ପ୍ରଣବ ବଳବନ୍ତରାୟ, ଅମରେଶ ପତିଙ୍କୁ ଧନ୍ୟବାଦ ଜଣାଇଛନ୍ତି । ସେହିଭଳି ଭାବେ ଆଜି ଦଳ ପକ୍ଷରୁ ଘୋଷଣା କରାଯିବା ପରେ ତାଙ୍କ ପାଖକୁ ଶୁଭେଚ୍ଛାର ସୁଅ ଛୁଟିଛି ।
