ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଖଣ୍ଡପଡ଼ା ତହସିଲଦାର ଧୋବେଇ ନାୟକଙ୍କ ନିର୍ଦ୍ଦେଶକ୍ରମେ ଲାଞ୍ଚ ନେଇଥିବା ବେଳେ ଭିଜିଲାନ୍ସ ଦ୍ୱାରା ମୋହରୀ ଗତକାଲି ରାତିରେ ଧରାପଡ଼ିଥିଲେ । ଏନେଇ ଭିଜିଲାନ୍ସ ଖୋଳତାଡ଼ କରିବା ପରେ ତହସିଲଦାରଙ୍କ ସମ୍ପୃକ୍ତି ଜଣାପଡ଼ିବା ପରେ ଉଭୟଙ୍କୁ ଗିରଫ କରାଯାଇଥିବା ସୂଚନା ମିଳିଛି । ଖଣ୍ଡପଡ଼ା ତହସିଲ ଅଧିନସ୍ଥ ମହାନଦୀରେ ଅନେକ ବେଆଇନ ବାଲିଘାଟ ଚାଲିଥିବା ବେଳେ ଏହାକୁ ପରୋକ୍ଷରେ ତହସିଲଦାର ଧୋବେଇ ନାୟକ ପ୍ରସୟ ଦେଇ ଆସୁଥିଲେ । ନିଲାମ ବାଲିଘାଟ ଗୁଡ଼ିକରୁ ହେଉଥିବା ବାଲି ଚାଲାଣ ଗାଡ଼ି ଗୁଡ଼ିକ ଧରି ଆକ୍ରୋଶ ମୂଳକ ଭାବେ ହଇରାଣ କରୁଥିଲେ । ଶୀଯୁକ୍ତ ନାୟକ ଖଣ୍ଡପଡ଼ା ବାଇପାସ ନିକଟରୁ ଦୁଇଟି ହାଇୱାକୁ ଧରିଥିଲେ । ଏହାକୁ ଛାଡ଼ିବା ପାଇଁ ହାଇୱା ମାଲିକଙ୍କୁ ୨୦ ହଜାର ଟଙ୍କା ମାଗିଥିଲେ । ଏନେଇ ହାଇୱା ମାଲିକ ଭିଜିଲାନ୍ସ ସହ ଯୋଗାଯୋଗ କରିଥିଲେ । ତହସିଲଦାରଙ୍କ ନିର୍ଦ୍ଦେଶରେ ମୋହରୀ ପ୍ରସନ୍ନ କୁମାର ସାହୁ ଲାଞ୍ଚ ଟଙ୍କା ଗ୍ରହଣ କରୁଥିବା ବେଳେ ଭିଜିଲାନ୍ସ ତାଙ୍କୁ ମାଡ଼ି ବସିଥିଲା । ପ୍ରସନ୍ନଙ୍କ ସୂଚନାନୁସାରେ, ତହସିଲଦାରଙ୍କୁ ମଧ୍ୟ ଭିଜିଲାନ୍ସ ଗିରଫ କରିବା ସହ ତାଙ୍କର ବିଭିନ୍ନ ସ୍ଥାନରେ ଥିବା ବାସଭବନରେ ଚଢ଼ାଉ କରାଯାଇଥିଲା । ଭୁବନେଶ୍ୱର ଘର, ଭାପୁର ଭଡ଼ା ଘର ସମେତ ଅଫିସ କାର୍ଯ୍ୟାଳୟରେ ଆଜି ଚଢାଉ କରାଯାଇଥିଲା । ଭିଜିଲାନ୍ସ ପକ୍ଷରୁ କେସ୍ ନଂ-୧୧ ରେ ମାମଲା ରୁଜୁ କରାଯାଇ ଆଜି ଭିଜିଲାନ୍ସ ତହସିଲଦାର ଓ ମୋହରୀଙ୍କୁ ଗିରଫ କରିଥିବା ବେଳେ ତଦନ୍ତ ଜାରି ରହିଥିବା ସୂଚନା ମିଳିଛି ।





