ମହାନଦୀରେ ବଢ଼ିଲା ଜଳସ୍ତର, ଯୋଗାଯୋଗ ବିଚ୍ଛିନ୍ନ ହେଲା ଏହି ଅଂଚଳ

ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲାରେ କରୋନା ମହାମାରୀ ସମୟରେ ବନ୍ୟା ପରିସ୍ଥିତି ସୃଷ୍ଟି ହେବାକୁ ବସିଛି । ଜିଲ୍ଲାର ବିଭିନ୍ନ ନଦୀର ଜଳସ୍ତର ବୃଦ୍ଧି ପାଇବା ସହ ମହାନଦୀ ଜଳସ୍ତର ମଧ୍ୟ ବୃଦ୍ଧି ପାଇଛି । ଫଳରେ ଆଜି ସକାଳୁ ଗଣିଆ ଛାମୁଣ୍ଡିଆ ରାସ୍ତା ଉପରେ ଆଣ୍ଠୁଏ ପାଣି ପ୍ରବାହିତ ହେଉଥିବା ବେଳେ ଜଳସ୍ତର ବୃଦ୍ଧି ପାଉଥିବାରୁ ଏହା ଆଗକୁ ବନ୍ୟାର ଋପ ନେବ ବୋଲି ଆଶଙ୍କା କରାଯାଉଛି । ସେହିଭଳି ଭାବେ ଭାପୁର ବ୍ଲକର କିଛି ଗ୍ରାମ ଜଳମଗ୍ନ ହେବ ବୋଲି ଆଶଙ୍କା ସୃଷ୍ଟି ହେଉଛି । ପ୍ରଶାସନ ପକ୍ଷରୁ ଏହି ଘଟଣା ଉପରେ ନଜର ରଖାଯାଇଥିବା ବେଳେ ଭାପୁର ଓ ଗଣିଆ ବ୍ଲକ ପ୍ରଶାସନ ବନ୍ୟା ମୁକାବିଲା ପାଇଁ ପ୍ରସ୍ତୁତ ହୋଇ ସାରିଥିବା ସୂଚନା ମିଳିଛି ।