୨ଦିନ ମଧ୍ୟରେ ୩ଟି ସ୍ଥାନରୁ ଟଙ୍କା ଓ ସାମଗ୍ରୀ ଲୁଟ
ଖଣ୍ଡପଡ଼ା, (ବାଘୁଆବାର୍ତ୍ତା) : ଖଣ୍ଡପଡ଼ା ଥାନା ଅଧିନ ଶିଖରପୁର ଗ୍ରାମ ଓ ଏହାର ଆଖପାଖ ଅଂଚଳରେ ଲୁଟେରାଙ୍କ ଦୈାରାତ୍ମ ଯୋଗୁଁ ଅଂଚଳବାସୀ ତ୍ରାହିତ୍ରାହି ଡ଼ାକୁଛନ୍ତି । ବିଳମ୍ବିତ ରାତିରେ ଲୁଟେରାମାନେ ସଂଘବଦ୍ଧ ଭାବେ ଘରେ ପ୍ରବେଶ କରି ଲୁଟପାଟ କରୁଥିବା ଅଭିଯୋଗ ହେଉଛି । ଶିଖରପୁର ବସଷ୍ଟାଣ୍ଡରେ ସ୍ଥାୟୀ ବାସଗୃହ ନିର୍ମାଣ କରି ରହୁଥିବା ସରିଫ୍ ମହମ୍ମଦଙ୍କ ବାରି ପଛ ପାଖ କବାଟ ଭାଙ୍ଗି ଲୁଟେରାମାନେ ଘରେ ପ୍ରବେଶ କରି ଗୃହକର୍ତ୍ତାଙ୍କୁ ଭୟଭୀତ କରିବା ସହ ନଗଦ ୪୦ ହଜାର ଟଙ୍କା, ଏକ ସୁନାଚେନ ସମେତ ବହୁ ମୂଲ୍ୟବାନ ସାମଗ୍ରୀ ଲୁଟି ନେଇଥିବା ନେଇ ଖଣ୍ଡପଡା ଥାନାରେ ଅଭିଯୋଗ ହୋଇଛି । ସେହିପରି ସ୍ଥାନୀୟ ଅଂଚଳର ସୁରେଶ ସାହୁଙ୍କ ଔଷଧ ଦୋକାନ କବାଟ ଭାଙ୍ଗି ୫୦ହଜାରରୁ ଉର୍ଦ୍ଧ ଟଙ୍କାର ଔଷଧ ଚୋରୀ ହୋଇଥିବା ବେଳେ ପ୍ରହଲ୍ଲାଦ ସାହୁଙ୍କ ତେଜରାତି ଦୋକାନରୁ ଲୁଟେରାମାନେ ନଗଦ ୨୦ହଜାରରୁ ଉର୍ଦ୍ଧ ଟଙ୍କା ସହ ମୂଲ୍ୟବାନ ସାମଗ୍ରୀ ସବୁ କିଛି ଲୁଟି ନେଇଥିବା ଥାନାରେ ଅଭିଯୋଗ ହୋଇଛି । ଅଭିଯୋଗ ଆଧାରରରେ ଖଣ୍ଡପଡ଼ା ଥାନାରେ ମାମଲା ରୁଜୁ କରି ପୋଲିସ ଘଟଣାର ତଦନ୍ତ ଚଳାଇଥିବା ଜଣାଯାଇଛି । ପ୍ରକାଶଥାଉକି କିଛିଦିନର ବ୍ୟବଧାନ ପରେ ଶିଖରପୁର ଅଂଚଳରେ ଲୁଟେରାମାନେ ପୁଣି ସକ୍ରୀୟ ହୋଇ ଉଠିଥିବାରୁ ସ୍ଥାନୀୟ ଅଂଚଳରେ ପୋଲିସ ପକ୍ଷରୁ ରାତ୍ରକାଳୀନ ପାଟ୍ରୋଲିଂ ବ୍ୟବସ୍ଥା କଡାକଡି କରିବାକୁ ଅଂଚଳବାସୀ ଦାବି କରିଛନ୍ତି । ତେବେ ଚୋରୀ ଘଟଣାରେ ସଂପୃକ୍ତ ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରିବାକୁ ଶିଖରପୁର ବାସିନ୍ଦା ଦାବି କରିଛନ୍ତି ।
