ନୟାଗଡ଼,(ବାଘୁଆବାର୍ତ୍ତା): ଓଡ଼ିଶାର ଗଣପର୍ବ ନୂଆଖାଇକୁ ନେଇ ସାରା ରାଜ୍ୟ ଆଜି ଉତ୍ସବ ମୁଖର ହୋଇପଡ଼ିଥିବା ବେଳେ ଏଥିରେ କରୋନା ମହାମାରୀ ଆଡ଼ ସୃଷ୍ଟି କରିଛି । ଆଜି ନୂଆଖାଇ ଅବସରରେ ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତି କରଣ, ମତ୍ସ୍ୟ ଓ ପ୍ରାଣୀ ସଂପଦ ଏବଂ ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ ରାଜ୍ୟ ବାସୀଙ୍କୁ ନୂଆଖାଇ ଜୁହାର ହୋଇଛନ୍ତି । ନୂଆଖାଇ ଓଡ଼ିଶାର ଏକ ଗଣପର୍ବ । ପ୍ରାୟତଃ ଓଡ଼ିଶାର ପଶ୍ଚିମ ଭାଗରେ ଏହା ବହୁଳ ଭାବରେ ପାଳନ କରାଯାଏ । ଏ ଅବସରରେ କୋଟି ଜୁହାର ବୋଲି ମନ୍ତ୍ରୀ ଡ. ସାହୁ କହିବା ସହ ଚାଷୀର ଶ୍ରମ ଓ ଚାଷ ଅମଳର ନୂଆଅନ୍ନ (ନବାନ୍ନ) ଇଷ୍ଟଦେବୀଙ୍କୁ ସମର୍ପଣ ପରେ ଆଜି ଘରେ ଘରେ ଏହା ପାଳିତ ହେଉଛି ବୋଲି କହିଛନ୍ତି । ଭାଇଚାରାର ଏହି ପର୍ବ କରୋନା ମହାମାରୀ ସମୟରେ ସାମାନ୍ୟ ଫିକା ପଡ଼ିଥିଲେ ମଧ୍ୟ ଆମ ସମାଜର ପ୍ରଗତି ଆଗକୁ ଆଗକୁ ଯିବ ଏବଂ ପରମ୍ପରା ଉଜ୍ଜିବିତ ରହିବ ବୋଲି ସେ କହିଛନ୍ତି ।
