ନିର୍ବନ୍ଧକୁ ସ୍ମୃତିରେ ପରିଣତ କଲେ ମନୋଜ

ନୟାଗଡ଼, (ବାଘୁଆବାର୍ତ୍ତା) : କରୋନା ମହାମାରୀ ସମୟରେ ବଦଳିଛି ମାନସିକତା, ବଦଳିଛି ବିବାହ କରିବାର ଆୟୋଜନ । ଗତ କିଛିଦିନ ତଳେ ଏକ ଦମ୍ପତ୍ତି ଜିଲ୍ଲାପାଳଙ୍କ କାର୍ଯ୍ୟାଳୟରେ ଆଦର୍ଶ ବିବାହ କରି ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ସହାୟତା ପ୍ରଦାନ କରିଥିବା ବେଳେ ଆଜି ଜଣେ ଆଗ୍ରହୀ ଯୁବ ନେତା ତାଙ୍କ ନିର୍ବନ୍ଧକୁ ସ୍ମୃତି ଭାବେ ସାଇତିବା ପାଇଁ ମୁଖ୍ୟମନ୍ତ୍ରୀ ରିଲିଫ ପାଣ୍ଠି ସମେତ ବୃଦ୍ଧାଶ୍ରମକୁ ଅର୍ଥଦାନ କରିଥିବା ଜଣାଯାଇଛି । ସୂଚନାନୁସାରେ, ନୟାଗଡ଼ ସଦରବ୍ଲକ ଅନ୍ତର୍ଗତ ବାଲୁଗାଁର ସୁରେନ୍ଦ୍ର ନାୟକଙ୍କ ପୁଅ ମନୋଜ କୁମାର ନାୟକ ଜଣେ ଯୁବ ନେତା ଭାବେ ପରିଚିତ । ସେ ନୟାଗଡ଼ ବ୍ଲକ ବିଜୁ ଯୁବ ବାହିନୀ କୋଅଡିନେଟର୍ ଭାବେ କାର୍ଯ୍ୟ କରୁଥିବା ବେଳେ ତାଙ୍କ ବିବାହ ନୂଆଗାଁ ବ୍ଲକ ଡାଳିଆମଡ଼ା ଗ୍ରାମର କୃଷ୍ଣଚନ୍ଦ୍ର ସ୍ୱାଇଁଙ୍କ ଝିଅ ପ୍ରଜ୍ଞା ପାରମିତାଙ୍କ ସହ ସ୍ଥିର ହୋଇଛି । ଆଜି ତାଙ୍କର ନିର୍ବନ୍ଧ ଅବସରରେ ସେ ନୟାଗଡ଼ ଉପଜିଲ୍ଲାପାଳ ଲଗ୍ନଜିତ ରାଉତଙ୍କ ଜରିଆରେ ମୁଖ୍ୟମନ୍ତ୍ରୀ ରିଲିଫ ପାଣ୍ଠିକୁ ୧୦ ହଜାର ଟଙ୍କା ସହାୟତା ପ୍ରଦାନ କରିଥିବା ବେଳେ ନୟାଗଡ଼ ନିକଟସ୍ଥ ବୃଦ୍ଧାଶ୍ରମ ସମର୍ପଣକୁ ୫ ହଜାର ଟଙ୍କାର ଅର୍ଥଦାନ କରିଛନ୍ତି । ଏଥିସହିତ ତପସ୍ୟା ଶୃଶୁ ଗୃହକୁ ୫ ହଜାର ଟଙ୍କା ସହାୟତା ଦେବାକୁ ସେ ସ୍ଥିର କରିଥିବା କହିଛନ୍ତି । ମନୋଜଙ୍କ ଏଭଳି କାର୍ଯ୍ୟକୁ ବିଜୁ ଜନତା ଦଳ ଯୁବ ସଭାପତି ରମେଶ ସାହୁ, ବିଜୁ ଯୁବ ବାହିନୀ ଜିଲ୍ଲା କୋଅଡିନେଟର୍ ଦୁର୍ଯ୍ୟୋଧନ ବେହେରାଙ୍କ ସମେତ ବହୁ ବୁଦ୍ଧିଜୀବୀ ପ୍ରଶଂସା କରିଥିବା ଜଣାଯାଇଛି ।