କ୍ରାନ୍ତି ଦିବସରେ ବିଜେଡି ପକ୍ଷରୁ ରକ୍ତଦାନ ଶିବିର

ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ବିଧାୟକ ତଥା ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତିକରଣ, ମତ୍ସ୍ୟ ଓ ପ୍ରାଣୀ ସଂପଦ ଏବଂ ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁଙ୍କ ନିର୍ଦ୍ଦେଶରେ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି । କ୍ରାନ୍ତି ଦିବସ ଅବସରରେ ନୟାଗଡ଼ ଜିଲ୍ଲା ବିଜୁ ଜନତା ଦଳ ପକ୍ଷରୁ ଆଜି ନୟାଗଡ଼ ପୈାରାଞ୍ଚଳ ଅନ୍ତର୍ଗତ ଜନସାଧାରଣଙ୍କ ଦ୍ୱାରା ରକ୍ତଦାନ ଶିବିର ଦଳୀୟ କାର୍ଯ୍ୟାଳୟରେ ଅନୁଷ୍ଠିତ ହୋଇଯାଇଛି । ଜୀବନ ବିନ୍ଦୁ ଆନୁକୁଲ୍ୟରେ ଆୟୋଜିତ ଏହି ରକ୍ତଦାନ ଶିବିରରେ ୬୦ ୟୁନିଟ ରକ୍ତ ସଂଗୃହିତ ହୋଇଥିବା ଜଣାଯାଇଛି । ଏହି ଅବସରରେ ପୈାରାଞ୍ଚଳର ଦୁଇ ନଂ ୱାର୍ଡ଼ ଏବଂ ୧୧ ନଂ ୱାର୍ଡ଼ରୁ ସର୍ବାଧିକ ୧୦ ୟୁନିଟ୍ ଲେଖାଁଏ ରକ୍ତ ସଂଗୃହିତ ହୋଇଥିବା ବେଳେ ରକ୍ତଦାନ କରିବା ପାଇଁ ଯୁବପୀଢ଼ିଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିଲା । ଏହି ରକ୍ତଦାନ ଶିବିରରେ ଜୀବନ ବିନ୍ଦୁ ଜିଲ୍ଲା ସଂଯୋଜକ ଗୁରୁପ୍ରସାଦ ଜେନା, ଯୁବ ସଭାପତି ରମେଶ ଚନ୍ଦ୍ର ସାହୁ, ବିଜୁ ଶ୍ରମିକ ସାମ୍ମୁଖ୍ୟ ସଂପାଦକ ଶ୍ରୀକାନ୍ତ ପଟ୍ଟନାୟକ, ନାରୀନେତ୍ରୀ ଜୟଶ୍ରୀ ଦାଶ ପ୍ରମୂଖ ଅଂଶ ଗ୍ରହଣ କରିଥିବା ବେଳେ ଛାତ୍ର ଓ ଯୁବ ବିଜେଡିର ବହୁ କର୍ମୀ ଓ ନେତା ସହଯୋଗ କରିଥିଲେ ।