ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ ଅନ୍ତର୍ଗତ ମଧ୍ୟଖଣ୍ଡରୁ ୩ ଦିନ ଭିତରେ ବ୍ୟାପକ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଏନେଇ ଜିଲ୍ଲା ପ୍ରଶାସନ ପକ୍ଷରୁ କୈାଣସି ସୂଚନା ଦିଆଯାଇ ନାହିଁ । ମାତ୍ର ଏହି ଘଟଣାରେ ଗୋଷ୍ଠୀ ସଂକ୍ରମଣ ଆଶଙ୍କା କରି ମଧ୍ୟଖଣ୍ଡ ସରପଂଚ ପଂଚାୟତକୁ ୭ ଦିନିଆ ସଟ୍ଡାଉନ୍ ଘୋଷଣା କରିଛନ୍ତି । ସରପଂଚଙ୍କ ସୂଚନା ମୁତାବକ, ଏହି ପଂଚାୟତର ଏକଚାଳିଆ ସାହି, ବାଲିସାହି, ପାଟଣାସାହି ଏବଂ ବଡ଼ସାହିରୁ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଯାହାକୁ ନେଇ ୪ ତାରିଖ ଠାରୁ ୧୦ ତାରିଖ ପର୍ଯ୍ୟନ୍ତ ପଂଚାୟତକୁ ସଟ୍ଡାଉନ୍ କରାଯିବା ସହ ନାକାବନ୍ଦୀ କରାଯାଇଛି । ଏହି ସାତ ଦିନ ମଧ୍ୟରେ ସମସ୍ତ ଜନସାଧାରଣ ଗୃହ ସଂଗରୋଧରେ ରହିବାକୁ ସରପଂଚ ଘୋଷଣା କରିଥିବା ବେଳେ ନିୟମ ଉଲଂଘନ କଲେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି । ଏନେଇ ସରପଂଚ ନୟାଗଡ଼ ଜିଲ୍ଲାପାଳ, ଆରକ୍ଷୀ ଅଧିକ୍ଷକ, ବିଡିଓ ଏବଂ ଥାନା ଅଧିକାରୀଙ୍କୁ ଅବଗତ କରିଥିବା ଜଣାଯାଇଛି ।
