ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଇଟାମାଟି ଥାନା ଅଂଚଳରେ ଏକ ନିଆରା ଘଟଣା ଦେଖିବାକୁ ମିଳିଛି । ଥାନାରେ ଅଟକ ଥିବା ଜଣେ ମହିଳା ଜଣେ ୨୩ ବର୍ଷିୟ ଯୁବକଙ୍କୁ ବାହା ହେବାକୁ ଅଡ଼ି ବସିଥିବା ଜଣାଯାଇଛି । ସୂଚନାନୁସାରେ, ଉକ୍ତ ଥାନା ଅଂଚଳର ଏକ ଗ୍ରାମର ଏହି ମହିଳାଙ୍କ ସ୍ୱାମୀ ରୋଗାକ୍ରାନ୍ତ ହୋଇ ପଡ଼ିଛନ୍ତି । ଫଳରେ ମହିଳା ଜଣଙ୍କ ଗ୍ରାମର ଜଣେ ୨୩ ବର୍ଷିୟ ଯୁବକଙ୍କ ସହ କିଛିଦିନ ହେବ ସଂମ୍ପର୍କରେ ରହିଥିଲେ । ଦୁଇ ଦିନ ତଳେ ରାତିରେ ଯୁବକ ଜଣଙ୍କ ମହିଳାଙ୍କ ଘରେ ପଶିଥିବା ବେଳେ ଗ୍ରାମବାସୀଙ୍କ ହାବୁଡ଼ରେ ପଡ଼ିଥିଲେ । ଗ୍ରାମବାସୀ ଉଭୟ ଯୁବକ ଏବଂ ମହିଳାଙ୍କୁ ଧରି ଥାନାରେ ଦେଇଥିବା ବେଳେ ମହିଳା ଜଣଙ୍କ ଉକ୍ତ ଯୁବକଙ୍କୁ ବିବାହ କରିବା ପାଇଁ ଅଡ଼ି ବସିଥିଲେ । ଅନ୍ୟପକ୍ଷେ, ମହିଳାଙ୍କ ସ୍ୱାମୀ ମଧ୍ୟ ତାଙ୍କୁ ଗ୍ରହଣ କରିବାକୁ ପ୍ରସ୍ତୁତ ନଥିବାରୁ ପୁଲିସ ଏହାକୁ ନେଇ ଏକ ଦ୍ୱନ୍ଦାତ୍ମକ ପରିସ୍ଥିତିରେ ପଡ଼ି ଆଜି ଉଭୟଙ୍କୁ ଥାନାରୁ ଛାଡ଼ିଛି । ମହିଳା ଜଣଙ୍କ ତାଙ୍କ ସ୍ୱାମୀକୁ ଛାଡ଼ପତ୍ର ଦେଇ ଉକ୍ତ ଯୁବକଙ୍କୁ ବିବାହ କରିବା ଏକ ପ୍ରକାର ସ୍ଥିର ହୋଇଥିବା ଜଣାଯାଇଛି । ଏହି ମହିଳାଙ୍କୁ ଦୁଇଟି ଛୁଆ ରହିଥିବା ଜଣାଯାଇଛି ।
