ନୂଆଦିଲ୍ଲୀ, (ବାଘୁଆବାର୍ତ୍ତା): ଲୋକସଭା ନିର୍ବାଚନ ପୂର୍ବରୁ କଂଗ୍ରେସକୁ ଏକ ବଡ଼ ଝଟକା ଲାଗିଛି । ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ତଥା ବରିଷ୍ଠ ରାଜନେତା ଅଶୋକ ଚୌହାନ କଂଗ୍ରେସର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି । ସେ ଖୁବଶୀଘ୍ର ବିଜେପିରେ ସାମିଲ ହୋଇପାରନ୍ତି ବୋଲି ଚର୍ଚ୍ଚା ଧୋର ଧରିଛି । ଉଲ୍ଲେଖଯୋଗ୍ୟ ଯେ କିଛି ଦିନ ପୂର୍ବେ ମହାରାଷ୍ଟ୍ର ସରକାରରେ ପୂର୍ବତନ ମନ୍ତ୍ରୀ ବାବା ସିଦ୍ଦିକୀ କଂଗ୍ରେସ ସହ ୪୮ ବର୍ଷର ସମ୍ପର୍କକୁ ଛିନ୍ନ କରି ପାର୍ଟିରୁ ଅଲଗା ହୋଇଥିଲେ । ଲୋକସଭା ଏବଂ ରାଜ୍ୟରେ ବିଧାନସଭା ନିର୍ବାଚନ ପୂର୍ବରୁ ଏହା କଂଗ୍ରେସ ପାଇଁ ବଡ଼ ଝଟକା ରୂପେ ଦେଖାଯାଉଛି । ଚର୍ଚ୍ଚା ଅନୁସାରେ ବିଜେପି ଏହି ବରିଷ୍ଠ ନେତାଙ୍କୁ ରାଜ୍ୟସଭା ପଠାଇପାରେ । ତେବେ ତିନି ଅନ୍ୟ ବିଧାୟକ ମଧ୍ୟ ଚୌହାନଙ୍କ ସହ ପାର୍ଟି ଛାଡ଼ି ପାରନ୍ତି । ଖବର ଅନୁସାରେ ଚୌହାନଙ୍କ ସହ ଅନ୍ୟ ତିନି ବିଧାୟକ ସୁଭାଷ ଧୋତେ, ଜିତେଶ ଅନ୍ତରପୁରତର ଏବଂ ଅମର ରାଜପୁରକର ମଧ୍ୟ ପାର୍ଟି ବଦଳାଇ ପାରନ୍ତି । ଅଶୋକ ଚୌହାନ ୨୦୦୮-୧୦ ଯାଏ ମହାରାଷ୍ଟ୍ର ମୁଖ୍ୟମନ୍ତ୍ରୀ ଥିଲେ । ତାଙ୍କ ବାପା ଏସବି ଚୌହାନ ପୂର୍ବତନ କେନ୍ଦ୍ରମନ୍ତ୍ରୀ ଥିଲେ । ଆଦର୍ଶ କୋ-ଅପୋରେଟିଭ୍ ହାଉସିଂ ସୋସାଇଟି ସ୍କାମ ପରେ ଅଶୋକ ଚୌହ୍ୱାନ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ଅଭିଯୋଗ ଥିଲା ଯେ ସେନାର ଜମିକୁ ରାଜନେତା ଏବଂ ସୈନ୍ୟ ଅଧିକାରୀମାନେ ହଡ଼ପ କରି ନେଇଥିଲେ ।
କଂଗ୍ରେସ ଛାଡ଼ିଲେ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଚୌହାନ
