ରାଉରକେଲା, (ବାଘୁଆବାର୍ତ୍ତା): ରାଉରକେଲା ପୋଲିସ ପାଇଁ ବଡ଼ ସଫଳତା । ୬ ଆନ୍ତର୍ଜାତିକ ସାଇବର ଠକଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଏହି ଗିରଫ ୬ ସାଇବର ଠକଙ୍କ ଘର ଛତିଶଗଡ଼ରେ । ଇନ୍ଦିରା ଇନଭେଷ୍ଟମେଣ୍ଟ ନାଁରେ ବେଆଇନ ଆପ୍ ଖୋଲି ଅଧିକ ଅର୍ଥ ମିଳିବା ଲୋଭ ଦେଖାଇ ଲୋକମାନଙ୍କୁ ବିନିଯୋଗ କରିବାକୁ କହୁଥିଲେ । ଆଉ ଲୋକେ ଲୋଭର ବଶବର୍ତ୍ତୀ ହୋଇ ବିନିଯୋଗ କରୁଥିଲେ । ରାଉରକେଲାର ଜଣେ ବ୍ୟକ୍ତି ୬୪ ଲକ୍ଷ ୭୦ହଜାର ବିନିଯୋଗ କରି ଅର୍ଥ ଫେରିନପାଇବାରୁ ଗତ ଡ଼ିସେମ୍ବର ମାସରେ ରାଉରକେଲା ସାଇବର ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ତଦନ୍ତ କରି ୬ ସାଇବର ଠକଙ୍କୁ ବାନ୍ଧିଛି । ଭାରତରୁ ବିଭିନ୍ନ ବ୍ୟକ୍ତିଙ୍କ ନାଁରେ ୨୦୦ ସିମ୍ ନେଇ ବିଦେଶରୁ ଅପରେଟ୍ ହେଉଥିଲା । ବିହାର, ମହାରାଷ୍ଟ୍ର, ତେଲେଙ୍ଗାନା, ତାମିଲନାଡ଼ୁ, କର୍ଣ୍ଣାଟକ, ଆନ୍ଧ୍ରପ୍ରଦେଶ, ଗୁଜୁରାଟ, କେରଳ, ଛତିଶଗଡ଼ ସହ ଝାଡ଼ଖଣ୍ଡରେ ଏହି ଠକ ଆକ୍ଟିଭ ଥିଲେ । ଗୋଟିଏ ବର୍ଷ ମଧ୍ୟରେ ଲୋକଙ୍କ ଠାରୁ ପ୍ରାୟ ୧୫ କୋଟି ଠକିଥିଲେ । ବିଭିନ୍ନ ବ୍ୟାଙ୍କରେ ଥିବା ସେଭିଂ ଆକାଉଣ୍ଟକୁ ଫ୍ରିଜ କରିଛି ପୋଲିସ । ଯେଉଁଥିରେ ପାଖାପାଖି ୧୫କୋଟି ଟଙ୍କା ସହ ୩୦ହଜାର କ୍ରୀଷ୍ଟ କରେନ୍ସି ଅଛି । ରାଉରକେଲା ପୋଲିସ ସହ ରାଜ୍ୟ କ୍ରାଇମବ୍ରାଞ୍ଚର ମିଳିତ ଉଦ୍ୟମରେ ବଡ଼ ସଫଳତା ମିଳିଛି । ପୋଲିସ ଘଟଣାର ଅଧିକ ତଦନ୍ତ କରୁଥିବା ବେଳେ ବିଦେଶରେ ବସି ଅପରେଟ୍ କରୁଥିବା ମାଷ୍ଟରମାଇଣ୍ଡକୁ ଗିରଫ କରିବା ପାଇଁ ପୋଲିସ ବ୍ଲୁପ୍ରିଣ୍ଟ ପ୍ରସ୍ତୁତ କରିଛି ।





