ଅମାନିଆ କରୋନା ଆକ୍ରାନ୍ତ, ଘରକୁ ପଳାଇଲେ

ନୟାଗଡ଼, (ବାଘୁଆବାର୍ତ୍ତା) : ଜିଲ୍ଲାରେ ଆଜି ଖଣ୍ଡପଡ଼ା ବ୍ଲକ ଜଗନ୍ନାଥପ୍ରସାଦ ଗ୍ରାମରୁ ୩୦ ଆକ୍ରାନ୍ତ ଚିହ୍ନଟ ହେବା ପରେ ଗାଁ ଲୋକଙ୍କ ଆମାନିଆ ପଣକୁ ନେଇ ସେଠାରେ ଲଙ୍କାକାଣ୍ଡ ସୃଷ୍ଟି ହୋଇଛି । କୋଭିଡ୍ କେୟାର ହୋମ୍‌ରେ ରଖାଯାଇଥିବା ୩୦ ଆକ୍ରାନ୍ତ ଘରକୁ ଚାଲି ଯାଇଥିବା ଜଣାଯାଇଛି । ସୂଚନାନୁସାରେ, ଗତକାଲି ରାତିରେ ପ୍ରଶାସନ କରୋନା ଆକ୍ରାନ୍ତମାନଙ୍କୁ ଆଣି ନିକଟସ୍ଥ ବିଦ୍ୟାଳୟରେ ରଖିଥିଲା । ଆଜି ଗ୍ରାମବାସୀମାନେ କୋଭିଡ୍ କଟକଣାକୁ ଉଲଂଘନ କରି ବିଦ୍ୟାଳୟ ଚାରିପାଖରେ ହୋହାଲ୍ଲା ଗଣ୍ଡଗୋଳ ସୃଷ୍ଟି କରିଥିବା ଜଣାଯାଇଛି । ଗ୍ରାମବାସୀମାନେ ଅତ୍ୟନ୍ତ ଅବୁଝା ହୋଇପଡ଼ିବା ସହ କିଭଳି ଏତେ ସଂଖ୍ୟକ କରୋନା ଆକ୍ରାନ୍ତ ବାହାରିଲେ ବୋଲି ଘଟଣାସ୍ଥଳରେ ପହଂଚିଥିବା ସ୍ୱାସ୍ଥ୍ୟ କର୍ମଚାରୀଙ୍କୁ ପଚାରିବା ସହ ଆକ୍ରାନ୍ତମାନଙ୍କୁ କୋଭିଡ୍ ହସ୍ପିଟାଲ ଛାଡ଼ିବାକୁ ଦେଲେ ନାହିଁ । ଯାହାକୁ ନେଇ ଖଣ୍ଡପଡ଼ା ତହସିଲଦାର୍‌, ବିଡିଓ, ଫତେଗଡ଼ ଥାନା ଅଧିକାରୀ ଘଟଣାସ୍ଥଳରେ ପହଂଚି ଉତ୍ୟକ୍ତ ଲୋକଙ୍କୁ ବୁଝାଶୁଝା କରିଥିଲେ । ମାତ୍ର ବିଭିନ୍ନ କାରଣ ଦେଖାଇ ଗ୍ରାମବାସୀ ଗଣ୍ଡଗୋଳ କରିବା ସହ ପ୍ରଶାସନ ଏବଂ ପୁଲିସ ଉପରକୁ ଢେଲାପଥର ମାଡ଼ରେ କରିବା ଫଳରେ ଜଣେ ପୁଲିସ କର୍ମଚାରୀ ଆହାତ ହେବା ସହ ଗୋଟିଏ ଆମ୍ବୁଲାନ୍ସ କାଚ ଭାଙ୍ଗିଥିବା ଜଣାଯାଇଛି । ଯାହାକୁ ନେଇ ନୟାଗଡ଼ ପୁଲିସ ମୁଖ୍ୟାଳୟରୁ ଦୁଇ ପ୍ଲାଟୁନ ଫୋର୍ସ ଗାଁରେ ପହଂଚି ମୃଦୁ ଲାଠିଚାଳନା କରିଥିବା ଜଣାଯାଇଛି । ଲାଠିଚାଳନା ପରେ ଗାଁ ଲୋକେ ସେଠାରୁ ଛତ୍ରଭଙ୍ଗ ଦେଇଥିବା ବେଳେ କୋଭିଡ୍ କେୟାର ହୋମ୍‌ରେ ଥିବା ୩୦ ଜଣ ଆକ୍ରାନ୍ତ ଘରକୁ ଚାଲି ଯାଇଥିବା ଜଣାଯାଇଛି । ଅପରାହ୍ନରେ ନୟାଗଡ଼ ଉପଜିଲ୍ଲାପାଳ ଲଗ୍ନଜିତ ରାଉତ ଘଟଣାସ୍ଥଳରେ ପହଂଚି ଉତ୍ୟକ୍ତ ଗ୍ରାମବାସୀଙ୍କ ସହ ଖବର ଲେଖା ହେବା ପର୍ଯ୍ୟନ୍ତ ଆଲୋଚନା ଜାରି ରଖିଛନ୍ତି । ସମସ୍ତଙ୍କର ସ୍ୱାବ ଟେଷ୍ଟ ଏବଂ କୋଭିଡ୍ କେୟାର ହୋମ୍‌କୁ ଅନ୍ୟତ୍ର ସ୍ଥାନାନ୍ତର ପାଇଁ ଗ୍ରାମବାସୀ ଦାବି କରୁଛନ୍ତି ।