ନୟାଗଡ଼, (ବାଘୁଆବାର୍ତ୍ତା) : ସାରା ଜିଲ୍ଲାରେ କରୋନା ପାଇଁ ଏବେ ସାଧାରଣ ରୋଗୀ ସେବା ବିପର୍ଯ୍ୟସ୍ତ ହୋଇପଡ଼ିଛି । ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରୁ ଗତ ୯ ତାରିଖରେ ସ୍ୱାସ୍ଥ୍ୟ କର୍ମଚାରୀମାନେ କରୋନା ଆକ୍ରାନ୍ତ ଚିହ୍ନଟ ହେବା ପରେ ଜିଲ୍ଲା ପ୍ରଶାସନ ପକ୍ଷରୁ ଡାକ୍ତରଖାନାକୁ ସିଲ୍ କରି ଦିଆଯାଇଛି । ଏହା ମଧ୍ୟରେ ୧୪ ଦିନ ବିତିସାରିଥିବା ବେଳେ ଡାକ୍ତରଖାନା ସିଲ୍ ଖୋଲା ଯାଇନଥିବା ଏବଂ ରୋଗୀ ସେବା ଆରମ୍ଭ କରାଯାଇନଥିବାରୁ ସାଧାରଣ ରୋଗୀମାନେ ସେବା ପାଇବାରୁ ବଂଚିତ ହେଉଛନ୍ତି । ସୂଚନାନୁସାରେ, ଗତ ୯ ତାରିଖ ରାତିରେ ଦଶପଲ୍ଲା ଡାକ୍ତରଖାନାରୁ ୭ ଜଣ କର୍ମଚାରୀ କରୋନା ଆକ୍ରାନ୍ତ ଚିହ୍ନଟ ହେବା ପରେ ଏକ ଭୟାନକ ପରିସ୍ଥିତି ସୃଷ୍ଟି କରିଥିଲା । ଡାକ୍ତରଖାନାରେ ଥିବା ରୋଗୀମାନେ କରୋନା ଭୟରେ ଛତ୍ରଭଙ୍ଗ ଦେଇଥିବା ବେଳେ ପ୍ରଶାସନ ପକ୍ଷରୁ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ସିଲ୍ କରି ଦିଆଯାଇଥିଲା । ଏହା ମଧ୍ୟରେ ୭ ଜଣ କରୋନା ଯୋଦ୍ଧା ଚିକିତ୍ସିତ ହୋଇ ଫେରି ସାରିଥିବା ବେଳେ ଏହି ଘଟଣାକୁ ୧୪ ଦିନ ବିତିଛି । ମାତ୍ର ଡାକ୍ତରଖାନାରେ ଆଜି ପର୍ଯ୍ୟନ୍ତ ସାଧାରଣ ରୋଗୀସେବା ବନ୍ଦ ରହିଥିବା ବେଳେ କେବଳ ଜରୁରୀକାଳିନ ଚିକିତ୍ସା ସୁବିଧା ପ୍ରଦାନ କରାଯାଉଛି । ଯାହାକୁ ନେଇ ଦଶପଲ୍ଲା ଅଂଚଳରେ ଅସନ୍ତୋଷ ପ୍ରକାଶ ପାଇଥିବା ଜଣାଯାଇଛି । ଜିଲ୍ଲା ପ୍ରଶାସନ ଏଦିଗରେ ଚିନ୍ତା କରି ଡାକ୍ତରଖାନାକୁ ସାଧାରଣରୋଗୀଙ୍କ ପାଇଁ କାର୍ଯ୍ୟକ୍ଷମ କରିବାକୁ ଦାବି ହେଉଛି ।
