ଦଶପଲ୍ଲା, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ପୁଲିସ ଜିଲ୍ଲାକୁ ୩ଟି ପୁଲିସ ଉପଖଣ୍ଡରେ ବିଭକ୍ତ କରାଯାଇଥିବା ବେଳେ ଦଶପଲ୍ଲାକୁ ସ୍ୱତନ୍ତ୍ର ପୁଲିସ ଉପଖଣ୍ଡ ଘୋଷଣା କରିବା ନେଇ ଦାବି ଉଠୁଛି । ଆଇନଶୃଙ୍ଖଳା ଦୃଷ୍ଟିରୁ ଦଶପଲ୍ଲା, ଗଣିଆ ଏବଂ ବାଣିଗୋଚ୍ଛା ଥାନାକୁ ନେଇ ପୁଲିସ ଉପଖଣ୍ଡ ଘୋଷଣା କରାଗଲେ ଏହି ଅଂଚଳର ଆଇନଶୃଙ୍ଖଳା ପରିସ୍ଥିତିରେ ସୁଧାର ଆସିପାରିବ ବୋଲି ମତ ପ୍ରକାଶ ପାଉଛି । ସୂଚନାନୁସାରେ, ନୟାଗଡ଼ ପୁଲିସ ଉପଖଣ୍ଡ କାର୍ଯ୍ୟାଳୟ ଅଧିନରେ ଦଶପଲ୍ଲା ଓ ବାଣିଗୋଚ୍ଛା ଥାନା ରହିଥିବା ବେଳେ ଖଣ୍ଡପଡ଼ା ପୁଲିସ ଉପଖଣ୍ଡରେ ଗଣିଆ ଥାନା ରହିଛି । ଦିନକୁ ଦିନ ଦଶପଲ୍ଲା ଓ ବାଣିଗୋଚ୍ଛା ଅଂଚଳରେ ଆଇନଶୃଙ୍ଖଳା ବିପର୍ଯ୍ୟସ୍ତ ଆଡ଼କୁ ଗତି କରିବା ସହ ଏହି ଅଂଚଳ ଲୋକଙ୍କ ଜୀବନ ଜୀବିକାରେ ସମସ୍ୟା ସୃଷ୍ଟି କରୁଛି । ଦଶପଲ୍ଲା ବ୍ଲକରେ ପୂର୍ବରୁ ମାଓବାଦୀଙ୍କ ଚଳପ୍ରଚଳ ରହୁଥିବା ବେଳେ ଗଣିଆ ବ୍ଲକରେ ମଧ୍ୟ ସମାନ ସ୍ଥିତି ଅଧିକାଂଶ ସମୟରେ ଦେଖାଯାଇଛି । ଦଶପଲ୍ଲାର ଚଡ଼େୟାପଲ୍ଲୀ, ନୂଆଗାଁ, ବାଣିଗୋଚ୍ଛା ଥାନା ଅଂଚଳର ବିଭିନ୍ନ ସ୍ଥାନ ଏବଂ ଗଣିଆ ବ୍ଲକର ବଡ଼ଶିଲିଙ୍ଗା ଅଂଚଳରେ ମାଓ ଚଳପ୍ରଚଳ ରହି ଆସୁଥିଲା । ମାତ୍ର ସରକାର ମାଓବାଦୀଙ୍କ ପାଦୃଭାବ ହ୍ରାସ ଘଟିଥିବାରୁ ଜିଲ୍ଲାକୁ ମାଓ ମୁକ୍ତ ଘୋଷଣା କରିଥିବା ବେଳେ ସାଧାରଣ ଲୋକଙ୍କ ମନରୁ କିନ୍ତୁ ଭୟ ଦୂର ହୋଇନାହିଁ । ଅନ୍ୟପକ୍ଷେ, ଦଶପଲ୍ଲା ଓ ବାଣିଗୋଚ୍ଛା ଦେଇ ଜିଲ୍ଲା ଏବଂ ଜିଲ୍ଲା ବାହାରକୁ ବ୍ୟାପକ ଗଞ୍ଜେଇ ଏବଂ ଗୋ ଚାଲାଣ କରାଯାଇଥିବା ଘଟଣା ବାରମ୍ବାର ସାମନାକୁ ଆସୁଛି । ଦଶପଲ୍ଲା ଅଂଚଳରେ ବିଗତ ଦୁଇ ବର୍ଷର ଅପରାଧ ଜନିତ ଘଟଣା ମଧ୍ୟ ସର୍ବୋଚ୍ଚ ସ୍ତରରେ ରହିଛି । ଏହି ଅଂଚଳରେ ବ୍ୟାପକ ଚୋରୀ, ଲୁଟ ତରାଜ ବଢ଼ିଥିବା ଜଣାଯାଇଛି । ଦିନ ଦ୍ୱିପହରେ ରାସ୍ତା ଉପରୁ ଲୁଟ ହେବା ସହ ଗାଁ ଗହଳୀରେ ମଧ୍ୟ ଲୁଟେରାଙ୍କ ପାର୍ଦୃଭାବ ବୃଦ୍ଧିପାଇଛି । ସେହିଭଳି ବାଣିଗୋଚ୍ଛା ଅଂଚଳରେ ଦେଶୀ ମଦ କାରବାରଠାରୁ ଆରମ୍ଭ କରି ବିଭିନ୍ନ ପ୍ରକାର ଅସାମାଜିକ କାର୍ଯ୍ୟ ବୃଦ୍ଧି ପାଇଛି । ଏହି ତିନଟି ଥାନା ଅଂଚଳ ବରିଷ୍ଠ ଅଧିକାରୀଙ୍କ ଦୃଷ୍ଟିରୁ ଦୂରରେ ରହୁଥିବାରୁ ସମସ୍ୟା ବେଳକୁ ବେଳ ତୀବ୍ରତ୍ତର ହେବାରେ ଲାଗିଛି । ଯାହାକୁ ନେଇ ନୟାଗଡ଼ ଜିଲ୍ଲାର ତିନଟି ପୁଲିସ ଉପଖଣ୍ଡକୁ ୪ରେ ପରିଣତ କରିବାକୁ ନେଇ ଦଶପଲ୍ଲା ଅଂଚଳରେ ଦାବି ଗୁମୁରିବା ଆରମ୍ଭ କରିଛି । ବିଭିନ୍ନ ସଂଗଠନ ଏନେଇ ରାଜ୍ୟ ସରକାର ଏବଂ ପୁଲିସ ମହାନିର୍ଦ୍ଦେଶକଙ୍କ ନିକଟରେ ଦାବି ଉପସ୍ଥାପନ କରିବାକୁ ସଜବାଜ ହେଉଥିବା ବେଳେ କେବଳ କରୋନା ଏବଂ କୋଭିଡ୍ କଟକଣାକୁ ଉଠିବାକୁ ଅଂଚଳବାସୀ ଅପେକ୍ଷା କରିଛନ୍ତି । ଅନ୍ୟପକ୍ଷେ, ଜିଲ୍ଲାରେ ୪ଟି ନିର୍ବାଚନ ମଣ୍ଡଳୀ ରହିଥିବା ବେଳେ ଦଶପଲ୍ଲା ଭଳି ଏକ ବିରାଟ ଭୂଖଣ୍ଡ ତଥା ନିର୍ବାଚନ ମଣ୍ଡଳୀକୁ ପୁଲିସ ଉପଖଣ୍ଡରେ ପରିଣତ କରାଗଲେ ସାଧାରଣ ଲୋକେ ବ୍ୟାପକ ସୁବିଧା ପାଇବେ ବୋଲି ମତ ପ୍ରକାଶ ପାଇଛି । ଦଶପଲ୍ଲାରେ ଉପକାରାଗାରା, କୋର୍ଟ ଆଦି ରହିଥିବା ବେଳେ ଏହି ଅଂଚଳକୁ ପୁଲିସ ଉପଖଣ୍ଡ ମାନ୍ୟତା ସହ ଏସ୍ଡିପିଓ କାର୍ଯ୍ୟାଳୟ ନିର୍ମାଣ ନେଇ ଦାବିକୁ ପୁଲିସ ବିଭାଗ ଏବଂ ରାଜ୍ୟ ସରକାର ଗୁରୁତ୍ୱ ଦେବାର ଆବଶ୍ୟକତା ରହିଛି ।
