ନୂଆଦିଲ୍ଲୀ, (ବାଘୁଆବାର୍ତ୍ତା): ୩ ରାଜ୍ୟରେ କିଏ ହେବେ ମୁଖ୍ୟମନ୍ତ୍ରୀ। କାହାକୁ ଶାସନ ଦାୟିତ୍ବ ଦେବ ବିଜେପି ? ୨୦୨୪ ଲୋକସଭାରେ ମିଳିବ ତ ସଫଳତା ? ରାଜସ୍ଥାନ, ଛତିଶଗଡ଼, ମଧ୍ୟପ୍ରଦେଶରେ ସ୍ପଷ୍ଟ ବହୁମତ ପରେ ବି ବିଜେପିର ମୁଖ୍ୟମନ୍ତ୍ରୀ ଅଙ୍କକଷା ଶେଷ ହେଉନାହିଁ । ଦିଲ୍ଲୀରେ ହାଇକମାଣ୍ଡ ଘନଘନ ବୈଠକ ଡାକୁଛନ୍ତି। ହେଭିଓ୍ବେଟଙ୍କ ସହିତ ଆଲୋଚନା ପର୍ୟ୍ୟାଲୋଚନା ଚାଲୁଛି, ତଥାଫି ୫ଦିନ ପରେ ବି କେନ୍ଦ୍ରୀୟ ନେତୃତ୍ବ ନିଷ୍କର୍ସରେ ପହଞ୍ଚି ପାରୁନାହାନ୍ତି । ସତେ ଯେପରି ପଦ୍ମ ଘୁଞ୍ଚି ଘୁଞ୍ଚି ଯାଉଛି । ସେପଟେ କୁହାଯାଉଛି, ସୋମବାର ସୁଦ୍ଧା ଭାରତୀୟ ଜନତା ପାର୍ଟିର ଶୀର୍ଷ ନେତୃତ୍ବ ୩ ରାଜ୍ୟରେ ମୁଖ୍ୟମନ୍ତ୍ରୀ ଚୟନ ପାଇଁ ଚୂଡ଼ାନ୍ତ ନିଷ୍ପତ୍ତି ନେଇପାରନ୍ତି । ରବିବାର ଛତିଶଗଡ଼ରେ ବିଧାୟକ ଦଳ ବୈଠକ ବସିବ । ବିଧାୟକଙ୍କ ରାୟ ଆଧାରରେ ପର୍ୟ୍ୟବେକ୍ଷକ ଚୂଡ଼ାନ୍ତ ନିଷ୍ପତ୍ତି ନେବେ । ଆଜି ସଂଧ୍ୟା ସୁଦ୍ଧା ଛତିଶଗଡ଼ରେ ମୁଖ୍ୟମନ୍ତ୍ରୀଙ୍କ ନାଁ ଘୋଷଣା ହୋଇପାରେ । ରବିବାର ମଧ୍ୟାହ୍ନରେ ବିଜେପିର ବିଧାୟକ ଦଳ ବୈଠକ ବସିବ । ବିଜେପି ମୁଖ୍ୟମନ୍ତ୍ରୀ ଚୟନରେ ବିଳମ୍ବ କରିବାକୁ ନେଇ ବିଦାୟୀ ମୁଖ୍ୟମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ଭୂପେଶ ବଘେଲ କହିଛନ୍ତି, ୩ ରାଜ୍ୟରେ ଏହି ପ୍ରଶ୍ନ କୌନ ବନେଗା କରୋଡପତି ଭଳି ଲାଗୁଛି । କିଏ ନୁଆ ମୁଖ୍ୟମନ୍ତ୍ରୀ ହେବେ ତାହା ଦେଖିବାକୁ ଅପେକ୍ଷା ରହିଛି । ବିଜେପି ଛତିଶଗଡ଼ ପାଇଁ ମଧ୍ୟ ୩ ପର୍ୟ୍ୟବେକ୍ଷକ ନିଯୁକ୍ତ କରିଛି । ଏଠାରେ ମଧ୍ୟ ବିଜେପି ଉପମୁଖ୍ୟମନ୍ତ୍ରୀ ନିଯୁକ୍ତ କରିପାରେ ବୋଲି ଚର୍ଚ୍ଚା ହେଉଛି । ସେହିପରି ଛତିଶଗଡ଼ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ କାର୍ୟ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯୋଗ ଦେଇପାରନ୍ତି । ମଧ୍ୟପ୍ରଦେଶରେ ମଧ୍ୟ ସମାନ ସସ୍ପେନ୍ସ ଲାଗି ରହିଛି । ଏହି ରାଜ୍ୟରେ ବି ସୋମବାର ବିଜେପି ବିଧାୟକ ଦଳ ବୈଠକ ବସିବ । ଏଥିରେ ମୁଖ୍ୟମନ୍ତ୍ରୀଙ୍କ ନାଁରେ ମୋହର ବାଜିପାରେ । ରାଜସ୍ଥାନରେ ନୂଆ ମୁଖ୍ୟମନ୍ତ୍ରୀ ଚୟନ ପାଇଁ ଦିଲ୍ଲୀରୁ ଜୟପୁର ଯାଏ ରାଜନୀତି ଉଷ୍ଣ ରହିଛି । ସୋମବାର ରାଜସ୍ଥାନ ବିଧାୟକ ଦଳର ବୈଠକ ବସିବ । ଏହା ପୂର୍ବରୁ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡା ଶନିବାର ରାତିରେ ସମସ୍ତ ବିଧାୟକଙ୍କ ସହ ଆଲୋଚନା କରିଛନ୍ତି । ବିଧାୟକ ଦଳ ବୈଠକ ପାଇଁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସମେତ ଅନ୍ୟ ପର୍ୟ୍ୟବେକ୍ଷକମାନେ ରବିବାର ଜୟପୁରରେ ପହଞ୍ଚିବେ । ତେଣୁ ସମସ୍ତ ବିଧାୟକଙ୍କୁ ୨ଦିନ ଜୟପୁରରେ ରହିବାକୁ କୁହାଯାଇଛି । ଏହା ଭିତରେ ଆଲୋଚନା ହେଉଛି ଯେ, ବାବା ବାଲକନାଥ ମୁଖ୍ୟମନ୍ତ୍ରୀ ହେବାକୁ ନେଇ ହେଉଥିବା ଚର୍ଚ୍ଚାକୁ ସେ ଖାରଜ କରିଛନ୍ତି । ତାଙ୍କୁ ଏବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମାର୍ଗଦର୍ଶନରେ ଅଭିଜ୍ଞତା ନେବାର ଅଛି ବୋଲି ବାଲକନାଥ କହିଛନ୍ତି । ରାଜସ୍ଥାନ ପାଇଁ ବିଜେପି ରାଜନାଥ ସିଂ, ରାଷ୍ଟ୍ରୀୟ ମହାସଚିବ ବିନୋଦ ତାୱଡେ ଏବଂ ରାଜ୍ୟସଭା ସାଂସଦ ସରୋଜ ପାଣ୍ଡେଙ୍କୁ ପର୍ୟ୍ୟବେକ୍ଷକ ଭାବେ ନିଯୁକ୍ତ କରିଛି । ରାଜସ୍ଥାନରେ ମୁଖ୍ୟମନ୍ତ୍ରୀଙ୍କ ସମେତ ଦୁଇ ଉପମୁଖ୍ୟମନ୍ତ୍ରୀ ଫର୍ମୁଲା ମଧ୍ୟ ଆପଣାଯାଇପାରେ ବୋଲି କୁହାଯାଉଛି । ଯଦି ଦୁଇ ଜଣଙ୍କୁ ଉପମୁଖ୍ୟମନ୍ତ୍ରୀ ନିଯୁକ୍ତ କରାଯାଏ ତେବେ ସେମାନଙ୍କ ମଧ୍ୟରେ ଜଣେ ମହିଳା ରହିପାରନ୍ତି ।
୩ ରାଜ୍ୟରେ ଛିଡ଼ୁନି ସିଏମ୍ ଅଙ୍କ
