ରାଉରକେଲା, (ବାଘୁଆବାର୍ତ୍ତା): ଥାକ ଅଛି, ଦୋକାନ ଖାଲି । ଖୋଳ ଅଛି, ହେଲେ ନାହିଁ ମୋବାଇଲ । ରାଉରକେଲା କୋଏଲ ନଗର ଝିରପାଣି ମାର୍କେଟରେ ହୋଇଛି ବଡ଼ଧରଣର ଲୁଟ୍ । ଦୁଇ ଜଣ ଲୁଟେରା ଏକ ଦୋକାନରେ ପଶି ୯୭ଟି ମୋବାଇଲ୍ ଲୁଟି ନେଇଛନ୍ତି । ଯାହାର ଆନୁମାନିକ ମୂଲ୍ୟ ୨୮ ଲକ୍ଷ ଟଙ୍କା ହେବ । ତେବେ ଏବେ ଯାଏଁ ଲୁଟେରାଙ୍କୁ କାବୁ କରାଯାଇନଥିବା ବେଳେ ଲୁଟ୍ର ସମସ୍ତ ଚିତ୍ର ସିସିଟିଭିରେ କଏଦ ହୋଇଛି । ଖବର ଅନୁଯାୟୀ, ଗତ ଶନିବାର ବିଳମ୍ବିତ ରାତିରେ ଦୋକାନରୁ ଲୁଟ୍ ହୋଇଛି । ରାତି ୧୨.୨୦ରୁ ୨ଟା ପର୍ୟ୍ୟନ୍ତ ଲୁଟେରାମାନେ ଦୋକାନ ଭିତରେ ପଶିଥିଲେ । ସମସ୍ତ ମୋବାଇଲ ଖୋଳ ଫୋପାଡି ଦେଇ ଏକ ବ୍ୟାଗ୍ ଭିତରେ ଲୁଟି ନେଇଛନ୍ତି ।ଦୋକାନରେ ଥିବା ବିଭିନ୍ନ କମ୍ପାନୀର ୯୭ଟି ମୋବାଇଲ ଲୁଟ୍ କରିଛନ୍ତି ଲୁଟେରା । ଯାହାର ଆନୁମାନିକ ମୂଲ୍ୟ ପ୍ରାୟ ୨୮ ଲକ୍ଷ ଟଙ୍କା ହେବ ବୋଲି ଜଣାପଡିଛି । ଲୁଟ୍ ହୋଇଥିବା ମୋବାଇଲ ମଧ୍ୟରେ ୭ଟି ଆଇଫୋନ ରହିଛି । ରବିବାର ଦିନ ସକାଳ ସମୟରେ ମାଲିକ ଏବଂ କର୍ମଚାରୀ ଯେତେବେଳେ ଦୋକାନ ଖୋଲିଥିଲେ, ସେତେବେଳେ ଲୁଟ୍ ହୋଇଥିବା ସଂପର୍କରେ ଜାଣିଥିଲେ । ଏହାପରେ ଦୋକାନ ମାଲିକ ତୁରନ୍ତ ଝିରପାଣି ଥାନାକୁ ଲୁଟ୍ ନେଇ ଖବର ଦେଇଥିଲେ । ଝିରପାଣି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି । ଏହାସହିତ ଦୋକାନରେ ଲାଗିଥିବା ସିସିଟିଭି କ୍ୟାମେରାର ଫୁଟେଜକୁ ଆଧାର କରି ଯାଞ୍ଚ ଆରମ୍ଭ କରିଛି। ଝିରପାଣି ଥାନା ଠାରୁ ମାତ୍ର ୩୦୦ ମିଟର ଦୂରରେ ଏଭଳି ବଡ଼ଧରଣ ଲୁଟ୍ ହୋଇଛି । ଯାହାକୁ ନେଇ ସାଧାରଣରେ ପୋଲିସର ସୁରକ୍ଷା ବ୍ୟବସ୍ଥା ନେଇ ପ୍ରଶ୍ନବାଚୀ ସୃଷ୍ଟି କରିଛି । ୧୦ ଦିନ ପୂର୍ବରୁ ମାଲିକ ଚନ୍ଦନ କୁମାର ଝା ଏକ ମୋବାଇଲ୍ ଦୋକାନ ଖୋଲିଥିଲେ।





