ତଣ୍ଡ ଗଣିଲେ ବିନା ମାସ୍କଧାରୀ
ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ସହରରେ ଜିଲ୍ଲା ପ୍ରଶାସନର ନିର୍ଦ୍ଦେଶକୁ ଅଣଦେଖା କରି ବିନା ମାସ୍କରେ ବୁଲୁଥିବା ବ୍ୟକ୍ତି, ସାମାଜିକ ଦୂରତା ରକ୍ଷା କରୁନଥିବା ବ୍ୟବସାୟୀ ଏବଂ ବିନା କାରଣରେ ଗହଳୀ ଜମାଉଥିବା ଲୋକଙ୍କୁ ବାଟକୁ ଆଣିବାକୁ ଜିଲ୍ଲା ପ୍ରଶାସନ ସ୍ୱତନ୍ତ୍ର ସ୍ୱାର୍ଡ଼ ଗଠନ କରିଛି । ନୟାଗଡ଼ ଜିଲ୍ଲାପାଳ ଡ. ପୋମା ଟୁଡୁଙ୍କ ଦ୍ୱାରା ଗଠିତ ଏହି ସ୍ୱାର୍ଡ଼ର ଦାୟିତ୍ୱ ଉପଜିଲ୍ଲାପାଳ ଲଗ୍ନଜିତ ରାଉତଙ୍କୁ ଦିଆଯାଇଥିବା ବେଳେ ସ୍ୱାର୍ଡ଼ରେ ନୟାଗଡ଼ ଟାଉନଥାନା ଏସ୍ଆଇ ଧର୍ମେନ୍ଦ୍ର ଶିଆଳଙ୍କୁ ଟିମ୍ ଲିଡର ଭାବେ ନିଆଯାଇଛି । ତାଙ୍କ ସହିତ ୪ ଜଣ ପୁଲିସ କର୍ମଚାରୀ ଏଥିରେ ସାମିଲ ହୋଇଛନ୍ତି । ବିନା ମାସ୍କଧାରୀଙ୍କ ଠାରୁ ମୋଟା ଅଙ୍କର ଜୋରିମାନା ଆଦାୟ ସାଙ୍ଗକୁ ସାମାଜିକ ଦୂରତ୍ୱ ରକ୍ଷା କରୁନଥିବା ବ୍ୟବସାୟୀଙ୍କ ଦୋକାନକୁ ସିଲ୍ କରାଯିବ ବୋଲି ନିଷ୍ପତ୍ତି ଗ୍ରହଣ କରାଯାଇଛି । ଏପରିକି ବିନା କାରଣରେ ଗହଳୀ କରୁଥିବା ଲୋକଙ୍କୁ ବାଟକୁ ଆଣିବା ଦାୟିତ୍ୱ ଏହି ଟିମ୍କୁ ଦିଆଯାଇଥିବା ବେଳେ ଆଜି ନୟାଗଡ଼ ସହର ପୁରୁଣା ବସଷ୍ଟାଣ୍ଡଠାରେ ଅନେକ ବିନା ମାସ୍କଧାରୀଙ୍କ ଠାରୁ ଜୋରିମାନା ଆଦାୟ କରାଯାଇଛି । ନୟାଗଡ଼ ଉପଜିଲ୍ଲାପାଳ, ନୟାଗଡ଼ ତହସିଲଦାର୍ ଭିକାରୀ ସାହୁଙ୍କ ନେତୃତ୍ୱରେ ମାସ୍କ ବ୍ୟବହାର କରୁନଥିବା ଲୋକଙ୍କଠାରୁ ଜୋରିମାନା ଆଦାୟ କରାଯାଇଛି ।
