ଏସୀୟ କ୍ରୀଡ଼ା, ମେଡାଲରେ ସେଞ୍ଚୁରୀ କଲା ଭାରତ

ନୂଆଦିଲ୍ଲୀ, (ବାଘୁଆବାର୍ତ୍ତା): ଏସୀୟ କ୍ରୀଡ଼ାରେ ଭାରତର ରେକର୍ଡ । ପଦକରେ ଶତକ ମାରିଛି ଭାରତ । ଚୀନର ହାଙ୍ଗଝୌରେ ଚାଲିଥିବା ଏସିଆନ୍ ଗେମ୍ସରେ ଭାରତ ପ୍ରଥମ ଥର ପାଇଁ ୧୦୦ଟି ପଦକ ପାଇଛି । ସ୍ୱର୍ଣ୍ଣ ସହ ଭାରତକୁ ୧୦୦ତମ ପଦକ ଭେଟି ଦେଇଛି ମହିଳା କବାଡ଼ି ଦଳ । ରୋମାଞ୍ଚକର ଫାଇନାଲ୍ ମ୍ୟାଚରେ ଭାରତୀୟ ମହିଳା କବାଡ଼ି ଦଳ ଚୀନ୍ ତାଇପେକୁ ୨୬-୨୪ରେ ହରାଇ ସ୍ୱର୍ଣ୍ଣ ପଦକ ଜିତିଛନ୍ତି । ଏହା ଭାରତ ପାଇଁ ଐତିହାସିକ ସ୍ୱର୍ଣ୍ଣ । କାରଣ କବାଡ଼ିରେ ସ୍ୱର୍ଣ୍ଣ ସହ ଭାରତ ଶହେଟି ମେଡାଲ ଜିତିଛି । ବର୍ତ୍ତମାନ ସୁଧା ଭାରତ ୨୫ଟି ସ୍ୱର୍ଣ୍ଣ ପଦକ ହାତେଇଛି । ଏସିଆନ୍ ଗେମ୍ସର ୧୪ତମ ଦିନରେ ଭାରତକୁ ଆଉ ୫ଟି ପଦକ ମିଳିଛି । ତୀରନ୍ଦାଜୀରେ ୨ଟି ସ୍ୱର୍ଣ୍ଣ ସହ ଗୋଟିଏ ରୌପ୍ୟ ଓ ଗୋଟିଏ କାଂସ୍ୟ ମିଳିଥିବା ବେଳେ ମହିଳା କବାଡ଼ି ଦଳ ସ୍ୱର୍ଣ୍ଣ ଜିତିଛି । ମହିଳା ତୀରନ୍ଦାଜୀ କମ୍ପାଉଣ୍ଡ ଇଭେଣ୍ଟରେ ଭାରତର ଜ୍ୟୋତି ସୁରେକ୍ଷା ସ୍ୱର୍ଣ୍ଣ ପଦକ ପାଇଥିବା ବେଳେ ସମାନ ଇଭେଣ୍ଟରେ ଅଦିତି ଗୋପିଚାନ୍ଦ ହାତେଇଛନ୍ତି ବ୍ରୋଞ୍ଜ । ସେହିଭଳି ପୁରୁଷ ତୀରନ୍ଦାଜୀ କମ୍ପାଉଣ୍ଡ ଇଭେଣ୍ଟରେ ଓଜାସ୍ ପ୍ରବୀଣ ସ୍ୱର୍ଣ୍ଣ ପଦକ ପାଇଥିବା ବେଳେ ଅଭିଷେକ ପାଇଛନ୍ତି ରୌପ୍ୟ ।