ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ରେ ଆଜି ଏକ ଚାଞ୍ଚଲ୍ୟ ସୃଷ୍ଟି କଲା ଭଳି ହତ୍ୟା କାଣ୍ଡ ଘଟିଛି । ଜଣେ ଦେଶୀ ମଦ ବେପାରୀଙ୍କୁ କେହି ଶିଳରେ ଛେଚି ହତ୍ୟା କରିଛି । ନୟାଗଡ଼ ଟାଉନଥାନା ଅନ୍ତର୍ଗତ ଡିଆଁପଡ଼ା ଗ୍ରାମ ନିକଟରେ ଥିବା ଜଙ୍ଗଲ ପାଖରେ ଏହି ହତ୍ୟାକାଣ୍ଡ ଘଟିଥିବା ବେଳେ ମୃତକ ଜଣଙ୍କ ହେଲେ ଉକ୍ତ ଗ୍ରାମର ସ୍ୱର୍ଗତ ଚୈତନ୍ୟ ଜେନାଙ୍କ ପୁଅ ପ୍ରହଲ୍ଲାଦ ଜେନା (୬୫) । ସୂଚନାନୁସାରେ, ପ୍ରଦଲ୍ଲାଦ ଗାଁ ଜଙ୍ଗଲ ପାଖରେ ଥିବା ତାଙ୍କ ଜମି ନିକଟରେ ଏକ କୁଡ଼ିଆ କରି ଚାଷ ବାଷ କରିବା ସହ ଉକ୍ତ କୁଡ଼ିଆରେ ବସବାସ କରୁଥିଲେ । ତାଙ୍କର ପôତୀ କିଛି ବର୍ଷ ତଳେ ମୃତ୍ୟୁ ବରଣ କରିଥିବା ବେଳେ ବଡ଼ପୁଅ ବାସୁଦେବ କିଛିବର୍ଷ ହେବ ବିବାହ କରି ନିଜ ଶଶ୍ୱୁର ଘର ବାଲିଗୁଡ଼ାରେ ରହୁଥିଲେ । କିଛିଦିନ ହେବ ସେ ଡିଆଁପଡ଼ା ଫେରି ଏଠାରେ ରହିବା ପାଇଁ ଘର ତିଆରି କରୁଥିବା ଜଣାଯାଇଛି । ପ୍ରହଲ୍ଲାଦଙ୍କ ସାନପୁଅ ଜଗନ ଜେନା ଘରେ ରହୁଥିବା ବେଳେ ନିଜେ ପ୍ରହଲ୍ଲାଦ ସବୁ ସମୟରେ ଚାଷ ବିଲ ପାଖ କୁଡ଼ିଆରେ ରହିବା ରୋଷେଇ କରି ଚଳୁଥିଲେ । ଗତକାଲି ସଂନ୍ଧ୍ୟାରେ ସାନପୁଅ ବିଲରୁ ଫେରିଥିବା ବେଳେ ଆଜି ସକାଳୁ ବିଲକୁ ଯିବାକୁ ବାପା ପ୍ରହଲ୍ଲାଦ ତାଙ୍କୁ କହିଥିଲେ । ସାନପୁଅ ଆଜି ଭୋର ସମୟରେ ବିଲ ମୁଣ୍ଡ କୁଡ଼ିଆରେ ପହଂଚିବା ବେଳକୁ ସେଠାରେ ତାଙ୍କ ବାପାଙ୍କ ରକ୍ତ ଜୁଡ଼ୁବୁଡ଼ ମୃତ ଦେହ ଦେଖିବାକୁ ପାଇଥିଲେ । ଏନେଇ ସାନପୁଅ ଜଗନ ବାସୁଦେବଙ୍କୁ ଫୋନ ଯୋଗେ ଜଣାଇବା ପରେ ବାସୁଦେବ ଗାଁ ଲୋକଙ୍କୁ ଧରି ବିଲ ମୁଣ୍ଡରେ ପଂହଚି ବାପାଙ୍କୁ କେହି ମସଲା ବଟା ଶିଳରେ ଛେଚି ହତ୍ୟା କରିଥିବା ଦେଖିବାକୁ ପାଇଥିଲେ । ଖବରପାଇ ଟାଉନଥାନା ଏସ୍ଆଇ ଧର୍ମେନ୍ଦ୍ର ଶିଆଳ, ସ୍ମୃତି ରଂଜନ ମହାନ୍ତି, ଏଏସ୍ଆଇ ଅଶୋକ ମହାନ୍ତି ଘଟଣା ସ୍ଥଳରେ ପହଂଚି ଛାନଭିନ୍ ଆରମ୍ଭ କରିଥିବା ବେଳେ ବରିଷ୍ଠ ପୁଲିସ ଅଧିକାରୀମାନେ ମଧ୍ୟ ପଂହଚିଥିବା ଜଣାଯାଇଛି । ପ୍ରହଲ୍ଲାଦଙ୍କୁ ପୂର୍ବ ଶତ୍ରୁତାରୁ କେହି ହତ୍ୟା କରିଥିବା ନେଇ ଦୁଇ ପୁଅ ଅଭିଯୋଗ କରୁଥିବା ଜଣାଯାଇଛି । ଏଠାରେ ପ୍ରକାଶ ଯୋଗ୍ୟ ଯେ, ପ୍ରହଲ୍ଲାଦଙ୍କ ସାନପୁଅ ଜଗନ ସହ ତାଙ୍କ ଦାଦା ତଥା ପ୍ରହଲ୍ଲାଦଙ୍କ ଭାଇଙ୍କର କିଛିଦିନ ତଳେ ଗଣ୍ଡଗୋଳ ହୋଇଥିବା ବେଳେ ପ୍ରହଲ୍ଲାଦଙ୍କ ସହ ନିକଟସ୍ଥ ପଣ୍ଡୁସର ଗ୍ରାମର ଜଣେ ବ୍ୟକ୍ତିଙ୍କ ସହ ମଧ୍ୟ ଟଙ୍କା ପଇସାକୁ ନେଇ ଝଗଡ଼ା ରହିଥିଲା । ପୁଲିସ ଏହି ହତ୍ୟାକାଣ୍ଡର ଖୁବଶୀଘ୍ର ଖୁଲାସା କରିବ ବୋଲି ଅଂଚଳ ବାସୀ ଆଶା କରିଛନ୍ତି ।
ଦେଶୀ ମଦ ବେପାରୀଙ୍କୁ ଶିଳରେ ଛେଚି ହତ୍ୟା
