ରୋଟାରୀ କ୍ଲବର ୩୧ ତମ ଅଧିଷ୍ଠାନ ଉତ୍ସବ
ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ରୋଟାରୀ ଭବନଠାରେ ନୟାଗଡ଼ ରୋଟାରୀ କ୍ଲବର ୩୧ ତମ ଅଧିଷ୍ଠାନ ଉତ୍ସବ ସାମାଜିକ ଦୂରତା ରକ୍ଷା କରି ଅନୁଷ୍ଠିତ ହୋଇଯାଇଛି । କ୍ଲବର ପ୍ରତିଷ୍ଠା ୧୯୯୦ ମସିହାରେ ହୋଇଥିଲେ ମଧ୍ୟ ଆଜି ପର୍ଯ୍ୟନ୍ତ କେହି ମହିଳା ସଭାପତି ପଦ ଅଳଙ୍କୃତ କରିନଥିଲେ । ପ୍ରଥମ ଥର ପାଇଁ ଏହି ଅଧିଷ୍ଠାନ ଉତ୍ସବରେ କ୍ଲବର ବରିଷ୍ଠ ସଦସ୍ୟ ନିରୂପମା ପଟ୍ଟନାୟକ ବିଦାୟୀ ସଭାପତି ମଦନ ମୋହନ ମହାପାତ୍ରଙ୍କଠାରୁ ଦାୟିତ୍ୱ ଗ୍ରହଣ କରି ଶପଥ ପାଠ କରିଛନ୍ତି । ସେହିଭଳି ବିଦାୟୀ ସଂପାଦକ ପ୍ରବୀର ପୃଷ୍ଟିଙ୍କଠାରୁ ଚଳିତ ବର୍ଷ ପାଇଁ ମିହିର ରଂଜନ ନାୟକ ସଂପାଦକ ଭାବେ ଦାୟିତ୍ୱ ଗ୍ରହଣ କରିଥିବା ଜଣାଯାଇଛି । ଏହି ଉତ୍ସବରେ ପୂର୍ବତନ ସଂପାଦକ ଶ୍ରୀଯୁକ୍ତ ପୃଷ୍ଟି ବିଭିନ୍ନ କାର୍ଯ୍ୟକ୍ରମ ସଂମ୍ପର୍କରେ ସୂଚନା ପ୍ରଦାନ କରିବା ସହ ନୂତନ ଭାବେ ଦାୟିତ୍ୱ ଗ୍ରହଣ କରିଥିବା କର୍ମକର୍ତ୍ତାଙ୍କୁ ଦିଗ୍ଦର୍ଶନ ଦେଇଥିଲେ । କ୍ଲବର ମୁଖ୍ୟ ସଂଯୋଜକ ପ୍ରମୋଦ ପଟ୍ଟନାୟକ ନିସ୍ୱାର୍ଥ ପର ସେବା ମନ୍ତ୍ରରେ ଅଭିମନ୍ତ୍ରିତ ହେବା ଏବଂ ନିରୀହ ନିଷ୍ପେଷିତ ମଣିଷ ମାନଙ୍କର ଆଶାବାଡ଼ି ହେବା ପାଇଁ ପ୍ରତ୍ୟେକ ରୋଟାରୀଆନ୍ଙ୍କୁ ଆହ୍ୱାନ ଦେବା ସଙ୍ଗେ ସଙ୍ଗେ ଆହାର ଯୋଜନା, ପ୍ରବାସୀ ଶ୍ରମିକଙ୍କୁ ଖାଦ୍ୟ ଯୋଗାଣ, ଫିଜିଓଥେରାପି ଏବଂ ବୃଦ୍ଧାଶ୍ରମର ପ୍ରତ୍ୟେକ କାର୍ଯ୍ୟକ୍ରମରେ ରୋଟାରୀ କ୍ଲବ ସଭ୍ୟମାନଙ୍କ ଉପସ୍ଥିତି ଏବଂ ସଂପୃକ୍ତି ସଂମ୍ପର୍କରେ ବିସ୍ତୃତ ଆଲୋଚନା ରଖିଥିଲେ । ଅଧିଷ୍ଠାନ ଉତ୍ସବ ଅବସରରେ ବରିଷ୍ଠ ରୋଟାରୀଆନ୍ ବେଣୁଧର ମହାପାତ୍ର, ଡାକ୍ତର ଦିବସ ଅବସରରେ ଡାକ୍ତର ଭୂବନେଶ୍ୱର ଶୁକ୍ଲାଙ୍କୁ ସମ୍ବର୍ଦ୍ଧିତ କରାଯାଇଥିଲା । ଏହି ଅବସରରେ ଉପସଭାପତି ଆରିଫ୍ ଖାଁ ଧନ୍ୟବାଦ ଅର୍ପଣ କରିଥିବା ଜଣାଯାଇଛି ।
