ନୟାଗଡ଼, (ବାଘୁଆବାର୍ତ୍ତା) : କରୋନା ମହାମାରୀକୁ ନେଇ ରାଜ୍ୟ ସରକାରଙ୍କଠାରୁ ଜିଲ୍ଲା ପ୍ରଶାସନ ପର୍ଯ୍ୟନ୍ତ ସମସ୍ତେ ଚିନ୍ତା ଗ୍ରସ୍ତ ରହିଛନ୍ତି । ଏହି ପ୍ରରିପ୍ରେକ୍ଷିରେ ରାଜ୍ୟ ସରକାର ଜୁନ ଏବଂ ଜୁଲାଇ ମାସ ସମେତ ଅକ୍ଟୋମ୍ବର ମାସ ଯାଏଁ ଏହାର କଳାର ରୂପ ଦେଖାଯିବ ବୋଲି ଲକ୍ଷ୍ୟ ଧାର୍ଯ୍ୟ କରିଛନ୍ତି । ଯାହାକୁ ନେଇ ଜୁନ ମାସର ଶନିବାର ଏବଂ ରବିବାରକୁ ସରକାର ସଟ୍ଡାଉନ୍ ଘୋଷଣା କରିଛନ୍ତି । ଏହାକୁ ନେଇ ନୟାଗଡ଼ ସହର ସମେତ ଜିଲ୍ଲାର ସମସ୍ତ ସହରାଂଚଳରେ ଦୋକାନ ବଜାର ବନ୍ଦ ରହୁଥିବା ଏବଂ ଗାଡ଼ି ମୋଟର ଯାତାୟତ ବନ୍ଦ ରହିଛି । ମାତ୍ର ନୟାଗଡ଼ ଜିଲ୍ଲାର ପ୍ରତ୍ୟେକ ଗାଁରେ ଏହି ସଟ୍ଡାଉନ୍ କୈାଣସି ମାଇନା ରଖୁନଥିବା ଜଣାଯାଇଛି । ଅନେକ ଗ୍ରାମରେ ଦୋକାନ ବଜାର ଖୋଲିବା, ଚା ଖଟି ଜମିବା ସହ ଯାତାୟତ ଲାଗି ରହୁଥିବା ଦେଖିବାକୁ ମିଳିଛି । ଜିଲ୍ଲାକୁ ଆସିଥିବା ୧୧ ହଜାରରୁ ଉର୍ଦ୍ଧ୍ୱ ପ୍ରବାସୀଙ୍କ ମଧ୍ୟରୁ ଅନେକ ପ୍ରବାସୀ ଏବେ ସଂଗରୋଧ ମୁକ୍ତ ହୋଇ ବିଭିନ୍ନ ଗ୍ରାମାଞ୍ଚଳରେ ରହୁଥିବା ବେଳେ ସେମାନଙ୍କର ସ୍ୱାବ ପରୀକ୍ଷା କରାଯାଇ ନାହିଁ । ତଥାପି ଗ୍ରାମବାସୀ ଏହାକୁ ଭୃକ୍ଷେପ ନକରିବା ଆଗାମୀ ଦିନରେ ଭୟାବହ ପରିସ୍ଥିତି ସୃଷ୍ଟି କରିବ ବୋଲି ଆକଳନ କରାଯାଉଛି । ରାଜ୍ୟ ସରକାର ଏବଂ ଜିଲ୍ଲା ପ୍ରଶାସନର ନିୟମକୁ ମାନି ଗାଁରେ ମଧ୍ୟ ସାମାଜିକ ଦୂରତା ଅବଲମ୍ବନ, ମାସ୍କ ବ୍ୟବହାର ଏବଂ ସଟ୍ଡାଉନ୍ ନିୟମକୁ ପାଳନ କରିବାର ଆବଶ୍ୟକତା ରହିଛି ।
