ମୟୁରଭଞ୍ଜ, (ବାଘୁଆବାର୍ତ୍ତା): ମାଆ ସ୍ନେହ ଶ୍ରଦ୍ଧା ଓ ମମତାର ଅନ୍ୟ ନାମ । ପିଲା ପାଇଁ ତା ମାଆ ପାର୍ କରିଯାଏ ସବୁ ବାଧା ବନ୍ଧନ । ଶତ୍ରୁ ପାଖରୁ ଛଡାଇ ଆଣେ । ହେଲେ ବର୍ତ୍ତମାନ ଯୁଗରେ କିଛି କଳଙ୍କିନି ନାରୀ ସେହି ମାଆ ଶବ୍ଦକୁ ବଦନାମ କରିବାକୁ ପଛାଉନାହାନ୍ତି । ମାଆ ହୋଇ ନିଜର ଜନ୍ମକଲା ପୁଅକୁ ମଧ୍ୟ ପାଣିରେ ଫିଙ୍ଗି ଦେଇପାରେ । ଏମିତି ଏକ ଘଟଣା ଦେଖିବାକୁ ମିଳିଛି ମୟୁରଭଞ୍ଜ ଜିଲ୍ଲା ବିଶୋଇ ଥାନା ଅନ୍ତର୍ଗତ ବାଙ୍କିଡିହି ଗ୍ରାମରେ । ଘଟଣାରୁ ଯାହା ଜଣାପଡିଛି ଗାଁର ସେଲାଇ ନାଏକଙ୍କ ଦିତୀୟ ସ୍ତ୍ରୀ ପ୍ରଭାତୀ ନାଏକ ସୋମବାର ନିଜ ପୁଅକୁ ଗାଁ ପାଖରେ ଥିବା ଏକ ନାଳରେ ପକେଇଦେଇ ଆସିଥିଲେ । ପକେଇ ଆସିବା ପରେ ଗାଁରେ କହିଥିଲେ ତାଙ୍କ ପୁଅ ହଜିଯାଇଛି । ଏନେଇ ପରିବାର ବର୍ଗ ଓ ଗ୍ରାମବାସି ଖୋଜାଖୋଜି କରିଥିଲେ କିନ୍ତୁ ପାଇନଥିଲେ । ତାପରେ ସେମାନେ ଥାନାକୁ ଆସି ଅଭିଯୋଗ କରିବା ପରେ ପୋଲିସ ପ୍ରଭାତୀ ନାଏକକୁ ପଚରା ଉଚରା କଲା ପରେ ସେ କହିଥିଲେ ତାଙ୍କ ଭାଉଜଙ୍କ ପାଖରେ ଛୁଆକୁ ଛାଡିଛନ୍ତି । ପୁଣି ସେମାନେ ଗାଁ କୁ ଫେରିଆସି ପଡୋଶୀ ଘରକୁ ଯାଇଥିଲେ କିନ୍ତୁ ସେଠି କାହାକୁ ପାଇନଥିଲେ । ପରଦିନ ତାଙ୍କ ଘର ଲୋକ ପ୍ରଭାତୀକୁ ପଚାରିବାରୁ ସେ ପୁଅକୁ ନେଇ ନାଳରେ ଭସାଇ ଦେବା କଥା ମାନିବା ସହିତ ଭସାଇ ଥିବା ସ୍ଥାନକୁ ଦେଖେଇ ଥିଲା । ପରେ ଘଟଣା ସ୍ଥଳରେ ବିଶୋଇ ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚି ମୃତ ଶିଶୁ ପୁତ୍ରକୁ ଉଦ୍ଧାର କରି ଶବ ବ୍ୟବଚ୍ଛେଦ ପାଇଁ ରାଇରଙ୍ଗପୁର ଜିଲ୍ଲା ଉପଖଣ୍ଡ ଚିକିତ୍ସାଳୟକୁ ପଠେଇଥିଲେ । ତା ସହିତ ସନ୍ତାନ ହତ୍ୟାକାରୀ ମାଆ ପ୍ରଭାତୀ ନାଏକକୁ ଗିରଫ କରି ବିଶୋଇ ଥାନାରେରେ ହତ୍ୟା ମାମଲା ରୁଜୁ କରି ମହିଳାକୁ ଅଟକ ରଖି ପୋଲିସ ଘଟଣାର ତଦନ୍ତ କରୁଥିବା ଜଣାପଡିଛି । ଅପରପକ୍ଷରେ କେଉଁ କାରଣରୁ ମହିଳା ଜଣଙ୍କ ନିଜ ଜନ୍ମିତ ପୁତ୍ର ସନ୍ତାନକୁ ହତ୍ୟା କଲେ ସଠିକ୍ ଜଣା ପଡ଼ିନାହିଁ ।





