ନୟାଗଡ଼, (ବାଘୁଆବାର୍ତ୍ତା): ଓଡ଼ିଶାରେ କରୋନା ଆକ୍ରାନ୍ତ ସଂଖ୍ୟା ଭୟାବହ ଭାବେ ବଢ଼ି ଚାଲିଛି । ରାଜ୍ୟରେ ନୂଆ ୨୧୦ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ମୋଟ ଆକ୍ରାନ୍ତଙ୍କ ସଂଖ୍ୟା ୫୯୬୨ ରେ ପଂହଚିଛି । ଏଥିମଧ୍ୟରେ ନୟାଗଡ଼ ଜିଲ୍ଲାରୁ ୩ ଜଣ ବାହ୍ୟ ଆକ୍ରାନ୍ତ ଚିହ୍ନଟ ହୋଇଥିବା ରାଜ୍ୟ ସରକାର ସୂଚନା ଦେଇଛନ୍ତି । ଗତକାଲି ଏନେଇ ଜିଲ୍ଲାକୁ ସୂଚନା ଆସିଥିବା ବେଳେ ଏହାକୁ ନେଇ ପ୍ରଶାସନର ଚିନ୍ତା ବଢ଼ିଛି । ଏମାନଙ୍କ ମଧ୍ୟରେ ନୟାଗଡ଼ ସହର ଦେବୋତ୍ତର କଲୋନୀର ଜଣେ , ଯଦୁମଣୀନଗର ଜଣେ ଏବଂ ନୟାଗଡ଼ ନିକଟସ୍ଥ ଜାମୁସାହିର ଜଣେ ଚିହ୍ନଟ ହୋଇଛନ୍ତି । ଏହି ତିନିଜଣ ସହରରୁ ଚିହ୍ନଟ ହୋଇଥିବା ସୁନା ବ୍ୟବସାୟୀଙ୍କ ପରିବାର ସଦସ୍ୟଙ୍କ ସଂସ୍ପର୍ଶରେ ଆସିଥିବା ଜଣାଯାଇଛି । ଏଥିମଧ୍ୟରୁ ଜାମୁସାହିରୁ ଚିହ୍ନଟ ହୋଇଥିବା ବ୍ୟକ୍ତି ସୁନା ଦୋକାନ କର୍ମଚାରୀ ବୋଲି ସୂଚନା ମିଳିଛି । ଏହି ବ୍ୟକ୍ତି ତାଙ୍କ ଗ୍ରାମରେ ଅନେକ ବ୍ୟକ୍ତିଙ୍କ ସଂସ୍ପର୍ଶରେ ଆସିଥିବା ଜଣାଯାଇଛି । ଯାହାକୁ ନେଇ ଜନସାଧାରଣଙ୍କ ମଧ୍ୟରେ ଭୟ ସୃଷ୍ଟି ହୋଇଥିବା ବେଳେ ଜିଲ୍ଲାପାଳ ଡ. ପୋମା ଟୁଡୁ ଜାମୁସାହିକୁ କଣ୍ଟେନମେଣ୍ଟ ଘୋଷଣା କରିଛନ୍ତି । ଆଜି ଏନେଇ ଜିଲ୍ଲାପାଳଙ୍କ କାର୍ଯ୍ୟାଳୟରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ସେହିପରି ଭାବେ ଦେବୋତ୍ତର କଲୋନୀ ଏବଂ ଯଦୁମଣୀ ନଗରରେ ସୁନା ବ୍ୟବସାୟୀଲିଙ୍କ ଥିବାରୁ ଯଦୁମଣୀନଗର ପାଇଁ କଟକଣା କରାଯାଇଛି । ଅନ୍ୟପକ୍ଷେ, ଏହି ଅଂଚଳରୁ ପ୍ରଶାସନ ପକ୍ଷରୁ ବିଶୋଧନ କରାଯିବ ଏବଂ ରାପିଡ୍ ସ୍ୱାବ ପରୀକ୍ଷା କରାଯିବ ବୋଲି ଜିଲ୍ଲାପାଳ ସୂଚନା ଦେଇଛନ୍ତି । ଯେପରି ଏହି ଅଂଚଳବାସୀ ବାହାରକୁ ନବାହରିବେ ଏବଂ ବାହାର ଲୋକ ଏହି ଅଂଚଳକୁ ପ୍ରବେଶ ନକରିବେ ସେ ନେଇ ଦୃଷ୍ଟି ଦିଆଯିବ ବୋଲି ଜଣାଯାଇଛି । ଏହି ସମ୍ବାଦିକ ସମ୍ମିଳନୀରେ ଅତିରିକ୍ତ ଜିଲ୍ଲାପାଳ ବିଧାନ ଚନ୍ଦ୍ର ରାୟ, ପ୍ରକଳ୍ପ ନିର୍ଦ୍ଦେଶକ ସୁବାଷ ଚନ୍ଦ୍ର ରାୟ, ଉପଜିଲ୍ଲାପାଳ ଲଗ୍ନଜିତ ରାଉତ, ବନଖଣ୍ଡ ଅଧିକାରୀ ଧନରାଜ୍ ଏଚ୍ଡି, ସୂଚନା ଓ ଲୋକ ସଂମ୍ପର୍କ ଅଧିକାରୀ ଡ. ପ୍ରମୋଦ କୁମାର ନାୟକ ପ୍ରମୂଖ ଉପସ୍ଥିତ ଥିଲେ । ଅନ୍ୟପକ୍ଷେ, ଜିଲ୍ଲାରେ ଆଜିଠାରୁ ଜିଲ୍ଲାପାଳଙ୍କ ନିର୍ଦ୍ଦେଶରେ ଦୋକାନ ବଜାର ଖୋଲା ସମୟରେ ପରିବର୍ତ୍ତନ ଘଟିଛି । ସକାଳ ୬ଟାରୁ ଦିନ ଗୋଟାଏ ପର୍ଯ୍ୟନ୍ତ ଦୋକାନ ବଜାର ଖୋଲା ରହିଛି । ସହରର ସମସ୍ତ ସୁନା ଦୋକାନକୁ ପୂର୍ବ ନିୟମନୁସାରେ ବନ୍ଦ ରହିବାକୁ ଜିଲ୍ଲାପାଳ କହିଛନ୍ତି । ଅନ୍ୟପକ୍ଷେ, ସାମାଜିକ ଦୂରତା ଅବଲମ୍ବନ କରିବା ଏବଂ ମାସ୍କ ବ୍ୟବହାର କରିବାକୁ ଜିଲ୍ଲାପାଳ ପରାମର୍ଶ ଦେଇଛନ୍ତି । ଏଥିସହିତ ବରିଷ୍ଠ ନାଗରିକମାନେ କୈାଣସି ବି ପରିସ୍ଥିତିରେ ବାହାରକୁ ନବାହାରିବାକୁ ଜିଲ୍ଲାପାଳ ପରାମର୍ଶ ଦେଇଛନ୍ତି ।
ଜାମୁସାହି କଣ୍ଟେନମେଣ୍ଟ, କଟକଣା ଭିତରେ ଯଦୁମଣୀନଗର : ଜିଲ୍ଲାପାଳ
