ନୟାଗଡ଼, (ବାଘୁଆବାର୍ତ୍ତା) : ବେଆଇନ ମାଙ୍କଡ଼ା ପଥର ମାଫିଆଙ୍କ ପଥର ଚାଲାଣ ଉପରେ ଆଜି ଉପଜିଲ୍ଲାପାଳ ଚଡ଼କ ପଡ଼ିଥିବା ଜଣାଯାଇଛି । ସୂଚନାନୁସାରେ, ଆଜି ଅପରାହ୍ନରେ ବେଆଇନ ମାଙ୍କଡା ପଥର ଚାଲାଣ ହେଉଥିବା ୨ଟି ଟ୍ରକକୁ ନୟାଗଡ଼ ଉପଜିଲ୍ଲାପାଳ ଲଗ୍ନଜିତ ରାଉତ ଜବତ କରିଛନ୍ତି । ଏଥିମଧ୍ୟରୁ ୨ଶହ ଖଣ୍ଡ ମାଙ୍କଡ଼ା ପଥର ଯାଉଥିବା ଓଆର୍ ୦୨ଇ ୦୫୧୧ ନମ୍ବର ବିଶିଷ୍ଟ ଟ୍ରକ ଠାରୁ ୩୦ହଜାର ଟଙ୍କା ଜୋରିମାନା ଆଦାୟ ହୋଇଥିବା ବେଳେ ଓଆର ୦୨ ଏଡବ୍ଲୁ ୫୪୦୨ ନମ୍ବର ବିଶିଷ୍ଟ ମିନିଟ୍ରକ ଜୋରିମାନା ଭରଣା କରିନଥିବାରୁ ଓଡ଼ଗାଁ ଥାନାରେ ଅଟକ ରହିଛି । ଯାହାକୁ ନେଇ ପଥର ମାଫିଆଙ୍କ ଭିତରେ କୋକୁଆ ଭୟ ସୃଷ୍ଟି ହୋଇଥିବା ବେଳେ ନିୟମିତ ଚଢ଼ାଉ କରିବା ପାଇଁ ଓଡ଼ଗାଁ ବାସୀ ଦାବି କରିଛନ୍ତି । ସ୍ଥାନୀୟ ପ୍ରଶାସନର କୋହଳ ମନୋଭାବ ପାଇଁ ଏହି ଅଂଚଳରେ ବେଆଇନ ମାଙ୍କଡ଼ା ପଥର ଚାଲାଣ ବ୍ୟାପକ ବୃଦ୍ଧି ପାଇଥିବା ଆଲୋଚନା ହେଉଛି । ଏଠାରେ ପ୍ରକାଶ ଯୋଗ୍ୟ ଯେ, ବିଗତ ଦିନରେ ଉପଜିଲ୍ଲାପାଳ ରଣପୁର ଅଂଚଳରେ ଚଢ଼ାଉ କରି ବହୁ ଗାଡ଼ି ଧରିବା ସହ ଜୋରିମାନା କରିଥିଲେ ।
