ନୟାଗଡ଼, (ବାଘୁଆବାର୍ତ୍ତା) : ଗତ ୨୦୨୦ ମସିହା ଜାନୁୟାରୀ ୨୫ ତାରିଖ ସନ୍ଧ୍ୟା ୯ଟା ସମୟରେ ଖଣ୍ଡପଡ଼ା ଥାନା ଅଧିନ ବେଣାଗାଡ଼ିଆ ଗ୍ରାମରେ ଜମିବାଡ଼ି ବିବାଦକୁ କେନ୍ଦ୍ରକରି ମରଣାନ୍ତକ ଆକ୍ରମଣ ଘଟଣାରେ ବେଣାଗାଡ଼ିଆ ଗ୍ରାମର ପ୍ରମୋଦ ଦାସ(୫୧)ଙ୍କର ଅକାଳ ମୃତ୍ୟୁ ହୋଇଥିଲା । ବେଣାଗାଡ଼ିଆ ବଜାର ମଧ୍ୟରେ ପ୍ରମୋଦ ଛିଡ଼ା ହୋଇଥିବା ବେଳେ ନିକଟସ୍ଥ କାଦୁଆ ଗ୍ରାମର ରମା ବେହେରା, ତାର ପୁଅ ଶିବ ଓ ୨ଜଣ ସହଯୋଗୀ ହଠାତ୍ ସେଠାରେ ପହଁଚି ଅତର୍କିତ ଭାବେ ଧାରୁଆ ଅସ୍ତ୍ରରେ ମରଣାନ୍ତକ ଆକ୍ରମଣ କରିବାରୁ ଘଟଣାସ୍ଥଳରେ ପ୍ରମୋଦଙ୍କର ମୃତ୍ୟୁ ହୋଇଥିଲା । ତେବେ ଘଟଣା ପରଠାରୁ ଅଭିଯୁକ୍ତମାନେ ଫେରାର ଥିବାରୁ ପୋଲିସ ସେମାନଙ୍କୁ ଗିରଫ କରି ପାରିନଥିଲା । ଗତ ୨ଦିନ ତଳେ ମରଣାନ୍ତକ ଆକ୍ରମଣ ଘଟଣାରେ ସଂପୃକ୍ତ ଥିବା ଅଭିଯୋଗରେ ପୋଲିସ ସ୍ଥାନୀୟ ଅଂଚଳରୁ ମୃତ ପ୍ରମୋଦଙ୍କ ସାନଭାଇ ପ୍ରଦୀପ ଦାସଙ୍କୁ ଗିରଫ କରି ଖଣ୍ଡପଡ଼ା ଥାନାରେ ଅଟକ ରଖି ଘଟଣାର ଖୋଳତାଡ଼ କରିଥିଲା । ସୋମବାର ପ୍ରଦୀପକୁ କୋର୍ଟ ଚାଲାଣ କରାଯାଇଥିବା ବେଳେ ସେଠାରୁ ତାକୁ ଖଣ୍ଡପଡ଼ା ସବଜେଲକୁ ପଠାଇ ଦିଆଯାଇଥିବା ଜଣାପଡିଛି । ସୂଚନାଯୋଗ୍ୟ ଘଟଣାର ୪ମାସ ପରେ ଖଣ୍ଡପଡା ପୋଲିସ ଉପରୋକ୍ତ ଘଟଣାରେ ସଂପୃକ୍ତ ଥିବା ଅଭିଯୋଗରେ ଜଣଙ୍କୁ ଗିରଫ କରିବାରେ ସକ୍ଷମ ହୋଇଥିବା ବେଳେ ଏବେବି ଅନ୍ୟ ଅଭିଯୁକ୍ତମାନେ ଫେରାରଥିବା ପୋଲିସ ସୂଚନାଦେଇଛି ।
