ଓଡ଼ଗାଁର ୫ ପଞ୍ଚାୟତରୁ ଉନ୍ନୟନ ମୂଳକ ତାଲିକା ସଂଗ୍ରହ
ନୟାଗଡ଼,(ବାଘୁଆବାର୍ତ୍ତା): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗାଁ ଗୁଡ଼ିକର ଭିତ୍ତିଭୂମୀ ବିକାଶ ପାଇଁ ନୂତନ ପରିକଳ୍ପନା କରିଛନ୍ତି । ନବୀନଙ୍କ ପରିକଳ୍ପନାରେ ନୟାଗଡ଼ର ଗାଁ ଗୁଡ଼ିକୁ ରୂପାନ୍ତରିତ କରିବା ପାଇଁ ନୟାଗଡ଼ ବିଧାୟକ ଡ. ଅରୁଣ କୁମାର ସାହୁ କାର୍ଯ୍ୟପନ୍ଥା ଆପଣାଇଛନ୍ତି । ନୟାଗଡ଼ ନିର୍ବାଚନ ମଣ୍ଡଳୀର ପ୍ରତି ପଞ୍ଚାୟତକୁ ଯାଇ ଉନ୍ନୟନ ମୂଳକ କାର୍ଯ୍ୟର ତାଲିକା ପ୍ରସ୍ତୁତ କରୁଛନ୍ତି । ନୟାଗଡ଼ ବିଧାୟକ ଡ. ଅରୁଣ କୁମାର ସାହୁ ରବିବାର ଓଡ଼ଗାଁ ବ୍ଲକର ୫ ପଞ୍ଚାୟତ ଗସ୍ତ କରି ଲୋକଙ୍କ ସହ ଆଲୋଚନା କରିଛନ୍ତି। ପ୍ରତି ପଞ୍ଚାୟତରେ ବୈଠକ କରିବା ସହ ମୁରବିଙ୍କ ନିଷ୍ପତ୍ତିକୁ ପ୍ରାଧାନ୍ୟ ଦେଇଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗାଁ ପାଇଁ ଦେଇଥିବା ବିକାଶର ବାର୍ତ୍ତାକୁ ଲୋକଙ୍କ ପାଖରେ ଉପସ୍ଥାପନ କରିବା କେଉଁଠି କ\’ଣ ଉନ୍ନତିମୂଳକ କାର୍ୟ୍ୟ ହେବ ସେ ନେଇ ବିଧାୟକ ସାହୁ ଲୋକଙ୍କ ଠାରୁ ସିଧାସଳଖ ପ୍ରକଳ୍ପ ତାଲିକା ସଂଗ୍ରହ କରିଛନ୍ତି। ଭିତ୍ତିଭୂମିର ବିକାଶ ସହ ସଂସ୍କୃତି, ସଂରକ୍ଷଣ, ପରମ୍ପରାର ପ୍ରୋତ୍ସାହନ ଓ ସୁରକ୍ଷା କରାଯିବ ବୋଲି ଜଣାପଡିଛି। ରବିବାର ନୟାଗଡ଼ ବିଧାୟକ ଡ଼ ଅରୁଣ କୁମାର ସାହୁ ଓଡ଼ଗାଁ ବ୍ଲକର ରାବେରା, ଶରଧାପୁର, ଭାଡ଼ିକିଳା, ସାକେରୀ ଓ କୋରପିଠା ଆଦି ପଞ୍ଚାୟତ ଗସ୍ତ କରି ଗାଁ ଗୁଡିକରେ ଚାଲୁ ରହିଥିବା ବିଭିନ୍ନ ନିର୍ମାଣ କାର୍ୟ୍ୟର ସମୀକ୍ଷା କରିବା ସହ ଗ୍ରାମବାସୀଙ୍କ ଠାରୁ ନୂତନ ପ୍ରକଳ୍ପ ତାଲିକା ସଂଗ୍ରହ କରିଥିଲେ। ଖୁବ ଶ୍ରୀଘ୍ର ବ୍ୟୟ ବରାଦ କରାଯିବ ବୋଲି କହିଥିଲେ। ବିଧାୟକଙ୍କ ଗସ୍ତ ସମୟରେ ବ୍ଲକ ଅଧ୍ୟକ୍ଷ ଲୋକନାଥ ସାହୁ, ଉପାଧ୍ୟକ୍ଷା ମୀରା ନାୟକ, ଜିଲ୍ଲା ବିଜେଡି ଉପସଭାପତି ନିତ୍ୟାନନ୍ଦ ପ୍ରଧାନ, ପୂର୍ବତନ ଜିଲ୍ଲା ପରିଷଦ ବିଭୁ ପ୍ରସାଦ ସାହୁ, ଜିଲ୍ଲା ବିଜେଡି ମହିଳା ସଭାନେତ୍ରୀ ବିରଜାଲକ୍ଷ୍ମୀ ସାହୁ, ଜିଲ୍ଲା ପରିଷଦ ସଭ୍ୟା ଝିଲ୍ଲୀ ପ୍ରଧାନ, ସରପଞ୍ଚ ଚାନ୍ଦିନୀ ରାଉତ, କୃଷ୍ଣଚନ୍ଦ୍ର ସେନାପତି, ଗୀତାଞ୍ଜଳି ସାହୁ, ପବିତ୍ର କୁମାର ସାହୁ, ପାୟଲ କୁମାରୀ ପ୍ରଧାନ, ସମିତି ସଭ୍ୟା କନକ ପାତ୍ର ଓ ବିଭିନ୍ନ ପଞ୍ଚାୟତର ନିର୍ବାଚିତ ପ୍ରତିନିଧି ଓ ଜନସାଧାରଣ ଉପସ୍ଥିତ ଥିଲେ।
