ଭୁବନେଶ୍ୱର, (ବାଘୁଆବାର୍ତ୍ତା): ଓଟିପି ସେୟାରିଂ ମାମଲାରେ କେବଳ ପାକିସ୍ତାନ ନୁହେଁ ଚୀନ ଲିଙ୍କ୍ ନେଇ ମଧ୍ୟ ସୁରାଗ ମିଳିଛି । ଅଭିଯୁକ୍ତ ଅଭିଜିତ ସଞ୍ଜୟ ଜାମ୍ବୁରେର ରିମାଣ୍ଡ ଅବଧି ଶେଷ ପରେ ତାକୁ ଜେଲ୍ ପଠାଇ ଦିଆଯାଇଛି । ତେବେ ଶେଷ ଦିନରେ ଏନଆଇଏ, ଏଟିଏସ୍ ଓ ଏସଟିଏଫ୍ ତାକୁ ମାରାଥନ୍ ଜେରା କରି ଅନେକ ଗୁରୁତ୍ବପୂର୍ଣ୍ଣ ତଥ୍ୟ ହାତେଇଛନ୍ତି । ତେବେ ମିଳିଥିବା ତଥ୍ୟ ଅନୁସାରେ, ଜମ୍ବୁରେ କୁଆଡ଼େ ପାକିସ୍ତାନ ସହ ଚୀନର କିଛି ଲୋକଙ୍କ ସହିତ ଯୋଗାଯୋଗରେ ଥିଲା। ଓଡ଼ିଶା ସହିତ ବିଭିନ୍ନ ରାଜ୍ୟରେ ରଖିଥିଲା ସ୍ଲିପର ସେଲ୍ । ନିଜେ ହନି ଟ୍ରାପରେ ପଡ଼ି ଫସିଥିଲା ଆଉ ଅନେକଙ୍କୁ ରାକେଟ ଭିତରକୁ ଟାଣିଥିଲା ଏମାନଙ୍କ ମାଧ୍ୟମରେ ଦେଶର ଗୁରୁତ୍ବପୂର୍ଣ୍ଣ ତଥ୍ୟ ସଂଗ୍ରହ କରୁଥିଲା । ଜମ୍ମୁ-କଶ୍ମୀର, ପଞ୍ଜାବ, ୟୁପି , ଓଡିଶା ଓ ମଧ୍ୟପ୍ରଦେଶର ବହୁ ବ୍ୟକ୍ତିଙ୍କ ସମ୍ପର୍କରେ ସେ ଥିଲା। ଯେଉଁମାନଙ୍କ ମାଧ୍ୟମରେ ସେ ଗୁରୁତ୍ବପୂର୍ଣ୍ଣ ତଥ୍ୟ ସଂଗ୍ରହ କରୁଥିଲା। ଏମାନଙ୍କ ନିକଟରୁ ଜମ୍ବୁରେ କେଉଁ ତଥ୍ୟ ହାସଲ କରିଛି। ପାକିସ୍ତାନ ଆଇଏସଆଇକୁ କି କି ତଥ୍ୟ ସେ ସେୟାର କରିଛି ତାର ଖୋଳତାଡ ଜାରି ରହିଛି । କେବଳ ପାକିସ୍ତାନ ନୁହେଁ ଚାଇନା ମଧ୍ୟ ଏଭଳି ସ୍ଲିପର ସେଲଙ୍କୁ ବ୍ୟବହାର କରୁଥିବା ସନ୍ଦେହ କରାଯାଉଛି।





