ଗଡିଲାନି ସେବା ଏସ୍କପ୍ରେସ, ଷ୍ଟେସନରେ ଚାପା ଉତ୍ତେଜନା

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଟାଉନ ଷ୍ଟେସନରେ ଆଜି ସକାଳୁ ଚାପା ଉତ୍ତେଜନା ଦେଖାଯାଇଛି। ନୟାଗଡ଼ରୁ ଭୁବନେଶ୍ୱର ଯାଉଥିବା ଇଞ୍ଜିନ ବାରମ୍ଵାର ଅଚଳ ହେଉଥିବା ବେଳେ ଆଜି ସାଂଘାତିକ ସମସ୍ୟା ସୃଷ୍ଟି ହୋଇଛି। ଟ୍ରେନ ଷ୍ଟାର୍ଟ କରାଯିବା ପରେ ପ୍ରେସର୍ ନେଇ ନଥିଲା। ଲଗାତାର ଭାବେ ତିନି ମାସ ଧରି ଏଭଳି ସମସ୍ୟା ସୃଷ୍ଟି ହେଉଥିବା ବେଳେ ରେଳ ବିଭାଗ ଅପାରଗତା ଓ କର୍ମଚାରୀଙ୍କୁ ଦାୟୀ କରିଛନ୍ତି। ଶହ ଶହ ସଂଖ୍ୟାରେ ଯାତ୍ରୀ ହଇରାଣ ହୋଇଛନ୍ତି। ସକାଳ ୬ ଟା ୩୦ ରେ ଛାଡ଼ିବାକୁ ଥିବା ଟ୍ରେନ ୮ ଟା ପର୍ଯ୍ୟନ୍ତ ବାହାରି ନଥିବା ବେଳେ ନୂଆଗାଁ ପୁରୀ ଟ୍ରେନ ବିଳମ୍ବିତ ହୋଇଥିଲା। ପୁରୀ ଟ୍ରେନକୁ ୭ ଟାରେ ଯିବାକୁ ଥିବା ବେଳେ ୮ ଟାରେ ୨ ନମ୍ବର ଟ୍ରାକରେ ଛଡାଯିବା ପାଇଁ ବ୍ୟବସ୍ଥା ହୋଇଥିଲା। ଏଭଳି ସମସ୍ୟାକୁ ନେଇ ଶହ ଶହ ଯାତ୍ରୀ ଫେରି ଯାଇଥିବା ବେଳେ ଅନେକ ଯାତ୍ରୀ ଷ୍ଟେସନ୍ କାର୍ଯ୍ୟାଳୟରେ ହୋହାଲ କରିଥିଲେ। ଦୀର୍ଘ ସମୟ ଅଟକି ରହିଥିବା ଯାତ୍ରୀଙ୍କୁ ପୁରୀ ଟ୍ରେନ ଯୋଗେ ଖୋର୍ଦ୍ଧା ରୋଡ ଷ୍ଟେସନ୍ ପଠାଯାଇଥିଲା। ନୟାଗଡ଼ ଭୁବନେଶ୍ଵର ଓ ନୂଆଗାଁ ଭୁବନେଶ୍ୱର ଟ୍ରେନ ଇଞ୍ଜିନ ବାରମ୍ଵାର ଅଚଳ ହେଉଥିବା ବେଳେ ତୁରନ୍ତ ଏହାକୁ ବଦଳାଇଲେ ବଡ଼ ଧରଣ ଆନ୍ଦୋଳନ ହେବ ବୋଲି ସୂଚନା ମିଳିଛି।