ନୟାଗଡ଼, (ବାଘୁଆବାର୍ତ୍ତା): ଦୁର୍ନୀତିଗ୍ରସ୍ତ ପୂର୍ବତନ ଯୋଗାଣ ଅଧିକାରୀ ବ୍ରଜେନ୍ଦ୍ର ନାୟକ ଗିରଫ । ଚଢ଼ାଉବେଳେ ଠାବ ହୋଇଥିବା ସମ୍ପତିର ହିସାବ ଦେଇନପାରିବାରୁ ବ୍ରଜେନ୍ଦ୍ରଙ୍କୁ ଗିରଫ କରିଛି ଭିଜିଲାନ୍ସ । ରେଡ ବେଳେ ବ୍ରଜେନ୍ଦ୍ରଙ୍କ ପାଖରୁ, ଅମାପ ସମ୍ପତି ଠାବ ହୋଇଥଲା । ରାଜଧାନୀର ବିଭିନ୍ନ ସ୍ଥାନରେ ତାଙ୍କର ୭ଟି ଘର ରହିଛି । ଭୁବନେଶ୍ୱର ଗ୍ୟାରେଜ ଛକ ରାଧାକୃଷ୍ଣ ନଗରରେ ଏକ ବିରାଟ ଅଟାଳିକା,ଯାହାର ମୂଲ୍ୟ ୨କୋଟିରୁ ଅଧିକ ବୋଲି ଆକଳନ କରାଯାଇଛି । ଭୀମଟାଙ୍ଗିରେ ଦୁଇ ମହଲା ଘର, ରାଜାରାଣୀ କଲୋନୀରେ ୨ଟି ତିନି ମହଲା ଅଟ୍ଟାଳିକା । ସେହିପରି ନିମାପଡା ସୁନାଗରଡାରେ ପୈତୃକ ଘର, ଫାର୍ମ ହାଉସ ଏବଂ ୧୦ଟି ଦୋକାନ ଘର ଥିବା ପ୍ରମାଣ ପାଇଛି ଭିଜିଲାନ୍ସ । ଏଥିସହ ପୁରୀ ବ୍ୟାଙ୍କରେ ୬୦ ଲକ୍ଷ ଟଙ୍କାର ଜମା ରାଶି , ୨୦ରୁ ଅଧିକ ଏଲଆଇସି ବଣ୍ଡ, ୧୫ରୁ ଅଧିକ ବ୍ୟାଙ୍କ ଆକାଉଣ୍ଟ ଠାବ ହୋଇଛି । କେବଳ ଏତିକି ନୁହେଁ ବାସ୍ତୁ ପାଇଁ ବ୍ରଜେନ୍ଦ୍ର ଘରେ ରଖିଥିଲେ ରୂପାର ହାତୀ । ଭିଜିଲାନ୍ସ ପକ୍ଷରୁ ନାମୀ ଦାମୀ ଜିନିଷର ହିସାବ ପାଇଁ ଆର୍କିଟେକଚର ଟିମର ସହାୟତା ନିଆଯାଇଥିଲା । କେବଳ ଘରର ଇଣ୍ଟେରିୟର ଆକଳନ ପାଇଁ ଏହି ଟିମକୁ ଲଗାଯାଇଥିବା ବେଳେ ସେମାନଙ୍କୁ ମାପଚୁପ ପାଇଁ ୨ ଘଣ୍ଟାରୁ ଅଧିକ ସମୟ ଲାଗିଥିଲା ।





