ପୁଲିସ ବାୟା, ଗଣମାଧ୍ୟମ ବେକାବୁ, ବନବିଭାଗ କାନ୍ଧରେ ବନ୍ଧୁକ !
ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଦଶପଲ୍ଲା ବନବିଭାଗ ପକ୍ଷରୁ ଟାଙ୍ଗନାଡ଼ି ଗ୍ରାମରୁ କୋଟରା ଜବତ ହୋଇଥିବା ବେଳେ ଏହି ଘଟଣା ପଛରେ ବାଣିଗୋଚ୍ଛା ଥାନା ଅଧିକାରୀଙ୍କ ସଂପୃକ୍ତିକୁ ନେଇ ଚର୍ଚ୍ଚା ହୋଇଥିଲା । ବନ ବିଭାଗ କୋଟରାଟିକୁ ଚାଷୀ ପଦ୍ମଚରଣ ମାଝୀଙ୍କ ଘରୁ ଜବତ କରିଥିବା ବେଳେ, ପଦ୍ମଚରଣ କୋଟରା ଘଟଣାର ବଲ୍ ବାଣିଗୋଚ୍ଛା ଥାନା ଅଧିକାରୀଙ୍କ ଉପରକୁ ଫିଙ୍ଗିଛନ୍ତି । ଏହି ଘଟଣାରେ ବନ ବିଭାଗ ତନାଘନା ଚଳାଇଥିବା ବେଳେ ପୁଲିସ ବିଭାଗ ଘଟଣାକୁ ନେଇ ବାୟା ହୋଇଥିବା ଜଣାଯାଇଛି । ଗଣମାଧ୍ୟମ ମଧ୍ୟ ଆଇଆଇସିଙ୍କ ଉପରକୁ ଆଙ୍ଗୁଠି ଉଠାଇଛି । ମାତ୍ର ସଂମ୍ପର୍ଣ୍ଣ ଘଟଣାରେ ପୁଲିସକୁ ବାୟା କରାଇ, ଗଣମାଧ୍ୟମକୁ ବେକାବୁ ସଜାଇ ବନବିଭାଗ କାନ୍ଧରେ ବନ୍ଧୁକ ରଖି ପୁଲିସ ବିଭାଗର ଅତିପ୍ରିୟ ଜୈନିକ ଦଲାଲ୍ ଖେଳ ପ୍ରସ୍ତୁତ କରିଥିବା ଆଲୋଚନା ହେଉଛି । ଘଟଣାର ପୂର୍ବଦିନ ରାତିରେ ବନବିଭାଗ ଉପରେ ଦଲାଲ ଜଣଙ୍କ ନିଜର କାୟା ବିସ୍ତାରି କୋଟରା ଜବତ କରାଇବା ଏବଂ ଆଇଆସିଙ୍କୁ ଫସାଇବାକୁ କହିଥିବାର ଅଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଘଟଣାରେ ବାଣିଗୋଚ୍ଛା ଥାନା ଅଧିକାରୀଙ୍କ ସଂପୃକ୍ତି ଥାଇ ପାରେ ଅଥବା ନଥାଇ ପାରେ, ମାତ୍ର ଏହି ଦଲାଲ୍ କାହା ପ୍ରଚୋରନାରେ ଆଇଆଇସିଙ୍କୁ ଫସାଇବାକୁ ଷଡ଼ଯନ୍ତ ରଚିଛନ୍ତି ତାକୁ ନେଇ ଆଲୋଚନା ହେଉଛି । ଏହା ପଛରେ ପୁଲିସ ବିଭାଗର କୈାଣସି ବରିଷ୍ଠ ଅଧିକାରୀଙ୍କ ହାତ ଅଛି ନା ନାହିଁ, ତାକୁ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି । ବିଗତ ଦିନରେ ଏହି ଚୂନ ମରା ଦଲାଲ୍ ଥାନାରେ ଦଲାଲି କରି ଲୋକଙ୍କୁ ଫସାଇ ଟଙ୍କା ଆଦାୟ କରୁଥିବା ନେଇ ଖବର ପ୍ରସାରଣ କରାଯାଇଥିଲା । ଏପରିକି ପୁଲିସ ବିଭାଗର ବିଭିନ୍ନ ଅଧିକାରୀଙ୍କୁ ସେ ତାଙ୍କ ଜାଲରେ ଫସାଇ ଥିବା ନେଇ ସୂଚନା ଦିଆଯାଇଥିଲା । ମାତ୍ର ଏହାକୁ ଖାତିରି ନକରି ଅନେକ ଅଧିକାରୀ ଏହି ଦଲାଲ୍ ମାଧ୍ୟମରେ ଦଲାଲି କରିବାରେ ସକ୍ରିୟ ରହିଛନ୍ତି । ଏବେ ଭାଇରାଲ ହୋଇଥିବା ଅଡିଓ ଘଟଣାର ମୋଡ଼ ବଦଳାଇବ ବୋଲି ଚର୍ଚ୍ଚା ଜୋର ଧରିଛି ।
