ନୟାଗଡ଼,(ବାଘୁଆବାର୍ତ୍ତା): କୋଭିଡ-୧୯ ପରିପ୍ରେକ୍ଷୀରେ କେନ୍ଦ୍ର ଓ ରାଜ୍ୟ ସରକାର କଟକଣା ଲାଗୁ କରିବା ସହ ଲକଡାଉନ ବ୍ୟବସ୍ଥା ଜାରି ରଖିଛନ୍ତି । ଫଳରେ ନୟାଗଡ଼ ଜିଲ୍ଲାରେ ୩ହଜାରରୁ ଉର୍ଦ୍ଧ୍ୱ ବିଡ଼ି ଶମିକ ଏବେ ଦୁର୍ଦ୍ଦିନରେ କାଳ ବିତାଉଛନ୍ତ, ଶହଶହ ବିଡ଼ିଶ୍ରମିକ ପରିବାରବର୍ଗ ଏବେ ଜୀବିକା ହରାଇ ହାତବାନ୍ଧି ବସିଛନ୍ତି । ନୟାଗଡ଼ ବ୍ଲକ କ୍ଷେଡ଼ପଡ଼ା, ଖଣ୍ଡପଡ଼ା ବ୍ଳକ ଅଂଚଳର ଖଳିସାହି, ମର୍ଦ୍ଦରାଜପୁର, ବେଣାଗାଡ଼ିଆ, ବାଣପୁର, ସିଧାମୂଳା, ବୋଦସା ପ୍ରଭୁତି ପଂଚାୟତରେ ବସବାସ କରୁଥିବା ବିଡ଼ି ଶ୍ରମିକ ପରିବାରଗୁଡ଼ିକ ଦୈନିକ ବିଡ଼ି ତିଆରି କରି ଦୁଇପଇସା ରୋଜଗାର କରି ପରିବାର ପ୍ରତିପୋଷଣ କରିଥାନ୍ତି । ଏପରିକି ଗୋଟିଏ ଗୋଟିଏ ପରିବାରର ପିଲାଙ୍କଠାରୁ ଆରମ୍ଭ କରି ବୟସ୍କ ଲୋକ ଓ ମହିଳାମାନେ ମଧ୍ୟ ବିଡି ତିଆରି କରିଥାନ୍ତି । ଏ ଅଂଚଳରୁ ପ୍ରସ୍ତୁତ ବିଡି କଟକ, ଭୂବନେଶ୍ୱର, ବ୍ରହ୍ମପୁର, ନୟାଗଡ ଓ କନ୍ଧମାଳ ଅଂଚଳକୁ ପଠାଯାଇଥାଏ । ମାତ୍ର ଲକଡାଉନ ଯୋଗୁଁ ବିଡ଼ି କମ୍ପାନୀ କର୍ତୃପକ୍ଷ ବିଡ଼ି କ୍ରୟ କରିବା ବନ୍ଦ କରିଦେଇଥିବା ଯୋଗୁଁ ବିଡ଼ି ଶ୍ରମିକମାନେ ଅସୁବିଧାର ସମ୍ମୁଖିନ ହୋଇଛନ୍ତି । ସରକାର ପ୍ରତ୍ୟେକବର୍ଗର ବ୍ୟକ୍ତିବିଶେଷଙ୍କ ନିମନ୍ତେ ସହାୟତା ପ୍ରଦାନ କରୁଥିବା ବେଳେ ବିଡ଼ି ଶ୍ରମିକମାନଙ୍କ ନିମନ୍ତେ ସେଭଳି କୈାଣସି ପ୍ୟାକେଜର ବ୍ୟବସ୍ଥା କରିନଥିବାରୁ ଏ ନେଇ ଅସନ୍ତୋଷ ପ୍ରକାଶ ପାଇଛି । ସୂଚନାଯୋଗ୍ୟ ବିଡ଼ି ଶ୍ରମିକମାନଙ୍କୁ ସରକାର ଚିହ୍ୱଟ କରି ପରିଚୟ ପତ୍ର ପ୍ରଦାନ କରିଛନ୍ତି । ମାତ୍ର କୈାଣସି ସହାୟତା ରାଶି ପ୍ରଦାନ କରାଯାଇନଥିବାରୁ ଖଣ୍ଡପଡା ଅଂଚଳର ବିଡ଼ି ଶ୍ରମିକମାନେ ଏବେ ଦୁଃଖରେ ଦିନ କାଟୁଛନ୍ତି । ଏଣୁ ଏମାନଙ୍କ ପ୍ରତି ଜିଲ୍ଲା ପ୍ରଶାସନ ଓ ରାଜ୍ୟ ସରକାର ସଦୟ ହେବାକୁ ବିଡ଼ି ଶ୍ରମିକ ସଂଘର ସଦସ୍ୟମାନେ ଦାବି କରିଛନ୍ତି ।
