ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଓଡ଼ଗାଁ ନିକଟସ୍ଥ ଗୋଡ଼ିପଲ୍ଳୀ ଭୁୟାଁଣୀ ହୋଟେଲ୍ ନିକଟରେ ଆଜି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ଶଶୁର ରଂଜନ କୁମାର ସାହୁଙ୍କ ମୃତ୍ୟୁ ଘଟିଥିବା ବେଳେ ଜ୍ୱାଇଁ ଶିବ ପ୍ରସାଦ ସେନାପତି ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି । ସୂଚନାନୁସାରେ, ଆଜି ଉଭୟ ଭଂଜନଗରରୁ ନୟାଗଡ଼ ରାସ୍ତାରେ ଜଗତସିଂହପୁର ଯାଉଥିଲେ । ଲାଲ ରଂଗର ଏକ ହୋଣ୍ଡାଇ ଆଇଟେନ ଓଡି୦୨ ଏଏମ୍ ୨୯୪୨ ନଂ ବିଶିଷ୍ଟ ଗାଡ଼ିରେ ଉଭୟ ଫେରୁଥିବା ବେଳେ କାରଟି ଭାରସାମ୍ୟ ହରାଇ ରାସ୍ତାକଡ଼ରେ ଥିବା ଜମିକୁ ଓଲଟି ପଡ଼ିଥିଲା । ଉଭୟ କାର ଭିତରେ ଚାପି ହୋଇ ରହିଥିବା ବେଳେ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଓଡ଼ଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତୀ କରିଥିବା ବେଳେ ଡାକ୍ତର ଶଶୁର ରଂଜନ କୁମାର ସାହୁଙ୍କୁ ମୃତ ଘୋଷଣା କରିଛନ୍ତି । ଜ୍ୱାଇଁ ଶିବ ପ୍ରସାଦଙ୍କ ଚିକିତ୍ସା ଚାଲିଥିବା ବେଳେ ଘଟଣାସ୍ଥଳରେ ପୁଲିସ ଓ ଅଗ୍ନିଶମ ବିଭାଗ ପହଂଚିଥିବା ଜଣାଯାଇଛି । ଉଭୟ ଶଶୁର ଜ୍ୱାଇଁ ଜଗସିଂହପୁର ଜିଲ୍ଲା ରାହାମା ଅଂଚଳର ବୋଲି ଜଣାପଡ଼ିଛି ।
