କଟକ, (ବାଘୁଆବାର୍ତ୍ତା): ଦାଦା ବଟି ମାଗିବା ଅଭିଯୋଗରେ ସାତ ଜଣଙ୍କୁ ବାନ୍ଧିଲା ପୋଲିସ । ଏହାପରେ ସମସ୍ତଙ୍କୁ କୋର୍ଟ ଚାଲାଣ କରିଛି କଟକ ବାଦାମବାଡ଼ି ଥାନା ପୋଲିସ । ଅଭିଯୁକ୍ତଙ୍କ ନିକଟରୁ ଟଙ୍କା ଓ ମୋବାଇଲ୍ ଜବତ କରିଛି ପୋଲିସ । ଖବର ଅନୁଯାୟୀ, ବାଦାମବାଡ଼ି ବସ୍ ଷ୍ଟାଣ୍ଡ ମଧ୍ୟରେ ଆସୁଥିବା ବସର ହେଲ୍ପର , କଣ୍ଡକ୍ଟରମାନଙ୍କ ଠାରୁ ୧୦୦ ଏବଂ ବୁଲା ବିକାଳୀଙ୍କୁ ଭୟଭୀତ କରି ୨୦୦ ଟଙ୍କା ଆଦାୟ କରୁଥିଲେ । ଯିଏ ନଦେଉଥିଲା ତାଙ୍କୁ ଜୀବନରୁ ମାରିଦେବା ପାଇଁ ଭୟଭୀତ ମଧ୍ୟ କରୁଥିଲେ। ଏସମ୍ପର୍କରେ ଶୁକ୍ରବାର ବାଦାମବାଡ଼ି ଥାନାରେ ହୋଇଥିବା ଲିଖିତ ଅଭିଯୋଗ ହୋଇଥିଲା । ଏହି ଅଭିଯୋଗକୁ ଆଧାର କରି ପୋଲିସ ସମସ୍ତ ଅଭିଯୁକ୍ତଙ୍କୁ ଗିରଫ କରିଛି । ତେବେ ଗିରଫ ଅଭିଯୁକ୍ତ ମାନଙ୍କରୁ ୫ ଜଣଙ୍କ ଘର ଶଙ୍କରପୁର ଅଞ୍ଚଳରେ ହୋଇଥିବା ବେଳେ ଅନ୍ୟ ଦୁଇ ଜଣଙ୍କ ଘର ଯୋବ୍ରା ଓ ବୟାଳିସ ମୌଜା ଅଞ୍ଚଳର ବୋଲି ଜଣାପଡିଛି। ସମସ୍ତ ଅଭିଯୁକ୍ତଙ୍କ ନିକଟରୁ ଟଙ୍କା ଓ ମୋବାଇଲ ଜବତ କରାଯାଇଥିବା ନେଇ ପୋଲିସ୍ ପକ୍ଷରୁ ସୂଚନା ମିଳିଛି।





