ପୁରୀ, (ବାଘୁଆବାର୍ତ୍ତା): ବାଇକରେ ଆସିଲେ ଠିକଣା ପଚାରିବା ବାହାନାରେ ମହିଳାଙ୍କ ବେକରୁ ସୁନା ଚେନ୍ ଲୁଟି ନେଲେ । ପୁରୀ ସଦର କଦଳୀ ବାଡି ପାଟଣାଠାରେ ଘଟିଛି ଏଭଳି ଘଟଣା । ଲୁଟର ଶିକାର ହୋଇଥିବା ମହିଳା ହେଉଛନ୍ତି ପଦ୍ମାବତୀ ପ୍ରଧାନ । ଗୁରୁବାର ଭୋର ସମୟରେ ପଦ୍ମାବତୀ ତାଙ୍କ ଦାଣ୍ଡ ଦୁଆରେ ଫୁଲ ତୋଳୁଥିବା ସମୟରେ ଦୁଇ ଜଣ ଲୁଟେରା ବାଇକରେ ଆସିଥିଲେ । ଜଣେ ଲୁଟେରା ବାଇକରେ ବସି ରହିଥିବା ବେଳେ ଅନ୍ୟ ଜଣେ ହିନ୍ଦିରେ ତାଙ୍କୁ ଠିକଣା ପଚାରିଥିଲେ । ତେବେ ସେଭଳି କୌଣସି ବ୍ୟକ୍ତି ଏଠାରେ ରହୁନଥିବା ପଦ୍ମାବତୀ କହିଥିଲେ । ଏହାପରେ ଲୁଟେରା ଜଣକ ପଦ୍ମାବତୀଙ୍କ ବେକରୁ ସୁନା ଚେନ୍ ଲୁଟି ନେଇଥିଲେ । ଚେନ୍ ଟି ୨୭ ଗ୍ରାମ୍ ଓଜନର ଥିବାବେଳେ ଏହାର ମୂଲ୍ୟ ପାଖାପାଖି ୨ ଲକ୍ଷ ଟଙ୍କା ହେବ ବୋଲି ଅନୁମାନ କରାଯାଉଛି । ଏନେଇ ଥାନାରେ ଅଭିଯୋଗ ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।





