ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ସହର ନିକଟବର୍ତ୍ତୀ ସ୍ଥାନରେ ଆଜି ଦୁଇଜଣ ଆଇନଜୀବୀଙ୍କୁ ମରଣାନ୍ତକ ଆକ୍ରମଣ ହୋଇଛି । ଆକ୍ରମଣରେ ଆହାତ ହୋଇଥିବା ଦୁଇ ଆଇନଜୀବୀ ବାପ ପୁଅ ବୋଲି ଜଣାଯାଇଛି । ସୂଚନାନୁସାରେ, ନୟାଗଡ଼ ଜିଲ୍ଲା ଖୁଣ୍ଟୁବନ୍ଧ ଗ୍ରାମରେ ଅଜୟ କୁମାର ମହାନ୍ତି ଏବଂ ତାଙ୍କ ପୁଅ ଅମରେନ୍ଦ୍ର ମହାନ୍ତି ଉଭୟ ଆଇନଜୀବୀ । ଆଜି ସେମାନେ କୋର୍ଟରୁ ନିଜ ଘରକୁ ଫେରୁଥିବା ବେଳେ ନୟାଗଡ଼ ନିକଟସ୍ଥ କଇଥଗାଡ଼ିଆ ଏବଂ ଜାମୁସାହି ମଝିରେ ଥିବା ଭୈରବି ମନ୍ଦିର ନିକଟରେ ଦୁଇ ଜଣ ଯୁବକ ତାଙ୍କୁ ଅଟଳାଇ ଲୁହା ରଡ଼ରେ ଆକ୍ରମଣ କରିଥିଲେ । ଫଳରେ ସେ ଅମରେନ୍ଦ୍ର ମଟରସାଇକେଲ ବୁଲାଇ ସେଠାରୁ ଚାଲି ଆସୁଥିବା ବେଳେ ପଛରୁ ତାଙ୍କୁ ପିଛା କରୁଥିବା ଅନ୍ୟ ଦୁଇଜଣ ଯୁବକ ତାଙ୍କୁ ସହ ମଟସାଇକେଲ ଧକ୍କା କରିଥିଲେ । ଫଳରେ ସେ ତଳେ ପଡ଼ି ଯାଇଥିଲେ । ଏହି ସମୟରେ ଅମରେନ୍ଦ୍ରଙ୍କ ଉପରେ ଦୁର୍ବତ୍ତମାନେ ଲୁହା ରଡ଼ରେ ଆକ୍ରମଣ କରିଥିଲେ । ଏହି ଆକ୍ରମଣରେ ଅମରେନ୍ଦ୍ରଙ୍କ ହାତ ଓ ଗୋଡ଼ରେ ଗଭୀର ଆଘାତ ଲାଗିବା ସହ ତାଙ୍କ ବାପା ବାଇକରୁ ପଡ଼ି ଆହାତ ହୋଇଛନ୍ତି । ପାଟିତୁଣ୍ଡ ଶୁଣି ସ୍ଥାନୀୟ ଲୋକେ ସେଠାରେ ପହଂଚିବା ବେଳକୁ ଦୁବୁର୍ତ୍ତମାନେ ଫେରାର ହୋଇଯାଇଥିବା ବେଳେ ସେମାନେ ମୁଖା ପିନ୍ଧିଥିବା ଜଣାପଡ଼ିଛି । ସ୍ଥାନୀୟ ଲୋକେ ଉଭୟ ବାପ ଓ ପୁଅଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିବା ବେଳେ ଅମରେନ୍ଦ୍ରଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଭୂବନେଶ୍ୱର ସ୍ଥାନାନ୍ତରିତ କରାଯାଇଛି । ଏହି ଆକ୍ରମଣ ଯୋଜନା ବଦ୍ଧ ଭାବେ କରାଯାଇଥିବା ନେଇ ଆଇନଜୀବୀମାନେ ମତ ପୋଷଣ କରୁଥିବା ବେଳେ ଅଭିଯୁକ୍ତକୁ ଯଥାଶୀଘ୍ର ଗିରଫ ପାଇଁ ଦାବି କରିଛନ୍ତି ।
ଆଇନଜୀବୀଙ୍କୁ ଲୁହା ରଡ଼ରେ ମରଣାନ୍ତକ ଆକ୍ରମଣ
